ءۇش جىلدىق باكالاۆريات: جوعارى ءبىلىم جۇيەسىندە نە وزگەرمەك؟

جاڭا فورمات بويىنشا وقۋ باعدارلاماسىنىڭ مازمۇنى مەن كرەديت سانى ازايمايدى. مىسالى، ستۋدەنت ستاندارتتى 240 كرەديتتى ءۇش جىلدا تولىق مەڭگەرۋى ءتيىس. ول ءۇشىن وقۋ پروتسەسى قارقىنداتىپ، ەكى سەمەستردىڭ ورنىنا ءۇش تريمەستر ەنگىزىلۋى مۇمكىن.

قازىر ەلىمىزدىڭ ءبىرقاتار ۋنيۆەرسيتەتىندە مۇنداي جۇيەمەن 16 مىڭنان استام ستۋدەنت ءبىلىم الىپ جاتىر. دەگەنمەن ءۇش جىلدىق وقۋ بارلىق ماماندىققا بىردەي قولايلى ەمەس. اسىرەسە ينجەنەريا، پەداگوگيكا، ۆەتەريناريا جانە ساۋلەت سياقتى پراكتيكالىق ءارى ارنايى دايىندىقتى قاجەت ەتەتىن سالالاردا وقۋ مەرزىمىن قىسقارتۋ كۇردەلى بولۋى مۇمكىن.

ساراپشىلاردىڭ پىكىرىنشە، وقۋ مەرزىمىنىڭ قىسقارۋى ءبىلىم ساپاسىنىڭ تومەندەۋىنە تىكەلەي اسەر ەتپەيدى. الايدا ستۋدەنتتەردىڭ جىلدىق وقۋ جۇكتەمەسى ارتادى: 240 كرەديتتى ءتورت جىلدا يگەرگەندە جىلىنا 60 كرەديت بولسا، ءۇش جىلدىق جۇيەدە 80 كرەديتكە دەيىن جەتەدى. بۇل ستۋدەنتتەردىڭ ۇلگەرىمىنە جانە ءبىلىمدى ساپالى مەڭگەرۋىنە اسەر ەتۋى مۇمكىن.

سوندىقتان ساراپشىلار وقۋ باعدارلامالارىن وڭتايلاندىرىپ، قايتالاناتىن پاندەر مەن ەسكىرگەن ماتەريالداردى قىسقارتۋدى ۇسىنادى. سونىمەن قاتار ستۋدەنتتەردىڭ بۇرىن مەڭگەرگەن بىلىمدەرى مەن داعدىلارىن كرەديت رەتىندە ەسەپكە الۋ ماڭىزدى. بۇل بوس ۋاقىتتى كاسىبي دايارلىققا، تاجىريبەگە جانە عىلىمي جۇمىستارعا جۇمساۋعا مۇمكىندىك بەرەدى.

حالىقارالىق تاجىريبەدە ءۇش جىلدىق باكالاۆريات كەڭ تارالعان. مىسالى، فرانسيا مەن نيدەرلاندتا ستاندارتتى باكالاۆريات ءۇش جىلعا سوزىلادى. گەرمانيادا تەوريالىق ءبىلىم وندىرىستىك تاجىريبەمەن ۇشتاستىرىلاتىن دۋالدى ءبىلىم بەرۋ جۇيەسى قولدانىلادى. الايدا ەۋروپاداعى ءۇش جىلدىق باعدارلامالار كوبىنە 180 ECTS كرەديتىن قامتىسا، قازاقستاندا 240 كرەديتتى ءۇش جىلدا يگەرۋ كوزدەلىپ وتىر.

ساراپشىلار جۇمىس بەرۋشىلەردىڭ ءبىلىم بەرۋ پروتسەسىنە قاتىسۋىن كۇشەيتىپ، تۇلەكتەردىڭ كاسىبي داعدىلارىنا باسىمدىق بەرۋ قاجەت ەكەنىن ايتادى. ءۇش جىلدىق جانە ءتورت جىلدىق باعدارلامالاردىڭ تيىمدىلىگىن جۇمىسقا ورنالاسۋ دەڭگەيى، جالاقى، كاسىبي بىلىكتىلىك جانە جۇمىس بەرۋشىلەردىڭ باعاسى ارقىلى سالىستىرۋ ۇسىنىلادى.

ءۇش جىلدىق باكالاۆرياتتىڭ ناتيجەسى قالاي باعالانادى؟

2027-جىلى عىلىم جانە جوعارى ءبىلىم مينيسترلىگى ەڭبەك جانە حالىقتى الەۋمەتتىك قورعاۋ مينيسترلىگىمەن، «اتامەكەن» ۇلتتىق كاسىپكەرلەر پالاتاسىمەن جانە بيزنەس وكىلدەرىمەن بىرلەسىپ، ءۇش جىلدىق وقۋ فورماتىنا زەرتتەۋ جۇرگىزەدى. زەرتتەۋ بارىسىندا تۇلەكتەردىڭ جۇمىسقا ورنالاسۋى، تابىسى، مامانداردى دايارلاۋ شىعىندارى جانە جۇمىس بەرۋشىلەردىڭ قاناعاتتانۋ دەڭگەيى باعالانادى.

زەرتتەۋ ناتيجەلەرى قازاقستاندا جوعارى ءبىلىم بەرۋ مەرزىمىنە قاتىستى الداعى شەشىمدەرگە نەگىز بولماق.