ءۇش جىلدا 12,1 ميلليون گەكتار جەر مەملەكەتكە قايتارىلدى

استانا. KAZINFORM - يگەرىلمەي جاتقان جانە ءتيىمسىز يگەرىلىپ وتىرعان تەلىمدەردى مەملەكەتتىك جەر قورىنا قايتارۋ جۇمىستارىنىڭ اياسىندا 12,1 ميلليون گەكتار القاپتىڭ يەسى وزگەرگەن.

э
Фото: sugdnews.com

جەر رەسۋرستارىن باسقارۋ كوميتەتىنىڭ ءتوراعاسى - جەردى پايدالانۋ مەن قورعاۋ جونىندەگى باس مەملەكەتتىك ينسپەكتور مۇرات تەمىرجانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا وسىنداي دەرەك كەلتىردى.

- بارلىق مۇددەلى مەملەكەتتىك ورگانداردىڭ ۇيلەسىمدى جۇمىسىنىڭ ارقاسىندا ءۇش جىلدا اۋقىمدى جۇمىستار اتقارىلدى. جالپى كولەمى 9,4 ميلليون گەكتار جەردە 4731 جوسپاردان تىس تەكسەرۋ جۇرگىزىلىپ، مەملەكەتتىك قورعا 12,1 ميلليون گەكتار جەر قايتارىلدى. ونىڭ 5,4 ميلليون گەكتارى 2022-جىلى، 4,6 ميلليون گەكتارى 2023-جىلى، 2,1 ميلليون گەكتارى 2024-جىلى قايتارىلدى، - دەدى ول.

وسى جەردىڭ 4,9 ميلليون گەكتارى جەر يەلەنۋشىلەرگە بەرىلگەن.

- 4,9 ميلليون گەكتار حالىقتىڭ قاجەتتىلىگى ءۇشىن جەرگىلىكتى ورگاندارعا بەرىلدى. ونىڭ ىشىندە 1,9 ميلليون گەكتار جەر جايىلىم رەتىندە، 3 ميلليون گەكتار جەر كونكۋرس نەگىزىندە جەر پايدالانۋشىلارعا ۇلەستىرىلدى. بۇل شارالار جايىلىم تاپشىلىعىن ازايتىپ، بۇرىن پايدالانىلماعان جەرلەردى اينالىمعا قوسۋعا مۇمكىندىك بەردى، - دەدى كوميتەت باسشىسى.

ەسكە سالساق، ءبىر اي بۇرىن ءماجىلىس دەپۋتاتى باقىتجان بازاربەك باس پروكۋرور بەرىك اسىلوۆتىڭ اتىنا ساۋال جولداپ، قاز ۇ ۋ- دىڭ جەرى مەملەكەتكە قاعاز جۇزىندە عانا قايتارىلعانىن ءمالىم ەتكەن ەدى.

سوڭعى جاڭالىقتار