ءۇش ايدا 115 مىڭ وزبەكستاندىق ەڭبەك ميگرانتى وتانىنا ورالدى
تاشكەنت. KAZINFORM - جىل باسىنان بەرى شەتەلدە جۇرگەن شامامەن 115 مىڭ وزبەكستاندىق ەڭبەك ميگرانتى وتانىنا ورالدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
وزبەكستان باسشىسىنىڭ باسپا ءسوز قىزمەتىنەن حابارلاعانداي، پرەزيدەنت شاۆكات ميرزيەيەۆ حالىقتى جۇمىسپەن قامتۋ باستى ماسەلە ەكەنىن اتاپ ءوتىپ، بارلىق دەڭگەيدەگى باسشىلارعا ونى جۇيەلى شەشۋدى تاپسىردى.
«قاڭتار - ناۋرىز ارالىعىندا 58 مىڭ ازامات، ساۋىردە 57 مىڭ وزبەكستاندىق وتانعا ورالدى. ال جىل سوڭىنا دەيىن تاعى 250-300 مىڭ ادام ەلگە قايتادى دەپ كۇتىلۋدە»، - دەپ ءمالىم ەتتى وزبەكستان پرەزيدەنتىنىڭ باسپا ءسوز حاتشىسى شەرزود اسادوۆ.
سايكەسىنشە شاۆكات ميرزيەيەۆ جاۋاپتى ورگاندارعا كوشى- قون بويىنشا ءبىرىڭعاي اقپاراتتىق پلاتفورما قۇرۋدى تاپسىردى. سونىمەن قاتار شەتەلدە جۇمىس ىستەيتىن جانە قيىن جاعدايعا تاپ بولعان وزبەكستاندىقتاردى وتانىنا ورالعاننان سوڭ جۇمىسقا ورنالاستىرۋعا جاردەمدەسۋ مىندەتى جۇكتەلدى.
