ءۇش ادام قازا تاپتى: پروكۋراتۋرا التىندى زاڭسىز ىزدەۋشىلەرگە ۇندەۋ جاسادى

 اقمولا وبلىسىنىڭ اۋماعىنداعى كەنىشتەرگە التىندى زاڭسىز ىزدەۋگە تۇسكەن 4,2 مىڭ ادام جاۋاپكەرشىلىككە تارتىلدى، دەپ حابارلايدى Kazinform. 

«ستەپنوگورسك ءوڭىرىنىڭ اۋماعىندا «التىنالماس» كومپانيالار توبىنا جاتاتىن التىن وندىرەتىن كەنىشتەر ورنالاسقانى بەلگىلى.

زاڭدا كوزدەلگەن جاۋاپكەرشىلىككە قاراماستان، ستەپنوگورسك ايماعىنىڭ اۋماعىندا جەراستى شاحتالارىنا زاڭسىز كىرۋدىڭ كوپتەگەن فاكتىلەرى بايقالادى.

سوڭعى 5 جىلدا شاحتالارعا زاڭسىز كىرگەنى ءۇشىن اكىمشىلىك قۇقىقبۇزۋشىلىق تۋرالى كودەكستىڭ 506-بابى بويىنشا 4295 تۇلعا اكىمشىلىك جاۋاپكەرشىلىككە تارتىلدى، ونىڭ ىشىندە قايتالاپ - 480 ادام، 3 رەتتەن ارتىق – 100 دەن استام تۇلعا تارتىلدى.

سونىمەن قاتار 2023 -جىلدا شاحتالاردا التىندى زاڭسىز ىزدەگەن 3 ادام قازا تاپتى»، - دەلىنگەن اقمولا وبلىسى پروكۋراتۋراسىنىڭ مالىمدەمەسىندە.

ءمالىم ەتىلگەندەي، سوڭعى ەكى جىلدا كۇزەتىلەتىن وبەكتىگە زاڭسىز كىرۋگە قاتىستى سوتقا دەيىنگى 8 تەرگەپ-تەكسەرۋ شاراسى باستالعان.

پروكۋراتۋرا ەسكە سالىپ وتكەندەي، قاۋىپتى وندىرىستىك وبەكتىگە زاڭسىز كىرۋ اكىمشىلىك قۇقىقبۇزۋشىلىق تۋرالى كودەكستىڭ 506-بابى بويىنشا اكىمشىلىك، سونداي-اق ق ر قىلمىستىق كودەكستىڭ 269-1-بابى بويىنشا قىلمىستىق جاۋاپكەرشىلىككە اكەلەدى. اتالعان باپتىڭ سانكسياسى جەتى جىلدان ون جىلعا دەيىنگى مەرزىمگە باس بوستاندىعىنان ايىرۋدى كوزدەيدى.