ءۇش ادام مىنگەن كولىك بالقاش كولىندە مۇز استىنا ءتۇسىپ كەتتى
قاراعاندى. KAZINFORM - قاراعاندى وبلىسىندا ءۇش ادامى بار كولىك مۇز استىنا ءتۇسىپ كەتتى. ولاردىڭ ەكەۋى ءوز بەتىنشە شىققان، ءۇشىنشىسىنىڭ دەنەسىن قۇتقارۋشى سۇڭگۋىرلەر تاپتى، دەپ حابارلايدى Kazinform اگەنتتىگى.
تۇندە اقتوعاي اۋدانىندا بالقاش كولىندە گۇلشات پەن تاسارال اۋىلدارىنىڭ اراسىندا قايعىلى وقيعا بولدى. مال ىزدەۋ بارىسىندا ءۇش ەر ادام كولىكپەن مۇز استىنا ءتۇسىپ كەتتى.
- ەكى ادام وزدىگىنەن شىعىپ، امان قالدى. ءۇشىنشى ازاماتتىڭ دەنەسىن قۇتقارۋشىلار ىزدەدى. بۇگىن تاڭەرتەڭ سۋ استىنان 1988-جىلى تۋعان ەر ادامنىڭ دەنەسى شىعارىلدى، - دەدى قاراعاندى وبلىسى ت ج د باسپا ءسوز قىزمەتىنەن.
قۇتقارۋشىلار قىستا مۇز ۇستىنە شىعۋ وتە قاۋىپتى ەكەنىن ەسكەرتەدى.
قايعىلى جاعدايلاردىڭ الدىن الۋ ءۇشىن قاراپايىم، ءبىراق ماڭىزدى قاۋىپسىزدىك ەرەجەلەرىن ساقتاۋ قاجەت:
مۇزدىڭ قالىڭدىعىن تەكسەرىڭىز: ءبىر ادام ءۇشىن ءقاۋىپسىز مۇز قالىڭدىعى كەمىندە 10 س م، ال كولىك ءۇشىن 30 س م.
قاراڭعى جانە جارىقتار بار مۇز ۋچاسكەلەرىنەن اۋلاق بولىڭىز: مۇنداي جەرلەر سەنىمسىز.
قاراڭعى ۋاقىتتا نەمەسە كورىنبەۋ جاعدايىندا مۇزعا شىقپاڭىز.
مۇزدى شامادان تىس جۇكتەمەڭىز: ۇلكەن توپتار نەمەسە تەحنيكا ونى سىندىرۋى مۇمكىن.
قايدا بارا جاتقانىڭىزدى جاقىندارىڭىزعا ەسكەرتىڭىز جانە ءاردايىم قۇتقارۋ قۇرالدارىن (ارقان، تاياق جانە ت. ب.) وزىڭىزبەن بىرگە الىپ ءجۇرىڭىز.
قاراعاندى مەن استانانىڭ ورتاسىندا 30 جولاۋشىسى بار اۆتوبۋس جولدا قالىپ قويعانىن جازعان بولاتىنبىز.
