ءدىني نەكەنىڭ زاڭدى كۇشى جوق - مينيسترلىك

استانا. KAZINFORM - ادىلەت مينيسترلىگىنىڭ رەسمي وكىلى تالعات ءۋالي ۆەدومستۆونىڭ باسپا ءسوز ءماسليحاتىندا ءدىني ءراسىم بويىنشا تىركەلگەن نەكەنىڭ زاڭدىق كۇشىنە بايلانىستى پىكىر ءبىلدىردى.

«كونستيتۋتسيانىڭ 1-بابىنا سايكەس قازاقستان رەسپۋبليكاسى ءوزىن دەموكراتيالىق، زايىرلى، قۇقىقتىق مەملەكەت رەتىندە بەكىتەدى جانە ونىڭ ەڭ جوعارى قۇندىلىقتارى ادام، ونىڭ ءومىرى، قۇقىقتارى مەن بوستاندىقتارى ەكەنى بەلگىلى.

«نەكە جانە وتباسى تۋرالى» كودەكستىڭ 2-بابىنا سايكەس تەك ارنايى ۋاكىلەتتى ورگانداردا تىركەۋدەن وتكەن نەكە عانا زاڭدى دەپ تانىلادى. ءدىني راسىمدەر بويىنشا جاسالعان نەكەنىڭ قازاقستان رەسپۋبليكاسى اۋماعىندا زاڭدى كۇشى جوق. سايكەسىنشە مۇنداي نەكە قۇقىقتىق رەتتەۋ تەتىكتەرىمەن قورعالمايدى. ەر مەن ايەلدىڭ زاڭدى نەكەدە تۇرماستان بىرگە ءومىر ءسۇرۋى دە نەكە رەتىندە تانىلمايدى. زاڭدى نەكە قۇزىرەتتى مەملەكەتتىك ورگاندا رەسمي تىركەلۋ كەرەك»، - دەدى ول.

بۇعان دەيىن تالعات ءۋالي تالعار وقيعاسى بويىنشا قانداي ساراپتاما ءجۇرىپ جاتقانىن ايتقان.

«اتالعان شۋلى وقيعاعا بايلانىستى ءىستىڭ ءمان-جايىن ايتا المايمىز. سەبەبى ول ىشكى ىستەر مينيسترلىگىنىڭ مىندەتىنە جاتادى. ال سوت-مەديتسينالىق ساراپتامالارعا كەلسەك، 5 ءتۇرلى ساراپتاما تاعايىندالدى. ولار: ءمايىتتىڭ ەكسپەرتيزاسى، سول جەردەگى شىققان ءورتتىڭ سەبەپتەرىن انىقتاۋ ەكسپەرتيزاسى، فوتو-تەحنيكالىق ەكسپەرتيزا، مولەكۋرليارلى-گەنەتيكالىق ەكسپەرتيزا، بيولوگيالىق ەكسپەرتيزا»، - دەدى ول.