ءدارىحانالاردى جاپپاي تەكسەرۋ: 200 گە جۋىق ادام جاۋاپقا تارتىلدى
استانا. KAZINFORM - ەل اۋماعىندا جوسپاردان تىس «دارمەك» رەسپۋبليكالىق جەدەل- پروفيلاكتيكالىق ءىس-شاراسى وتكىزىلدى، دەپ حابارلايدى Polisia.kz.
«وپەراتسيانىڭ نەگىزگى ماقساتى - ەسىرتكىنىڭ زاڭدى اينالىمى سالاسىنداعى قۇقىق بۇزۋشىلىقتار مەن ءدارىحانالىق ناشاقورلىقتىڭ تارالۋىنا جول بەرمەۋ. رەيدتىك ءىس- شارا كەزەڭىندە پرەكۋرسورلار مەن مەديتسينالىق پرەپاراتتاردى قولداناتىن مىڭنان استام ۇيىم، ونىڭ ىشىندە 721 ءدارىحانا، 77 قويما، 159 ەمدەۋ- پروفيلاكتيكالىق مەكەمەسى جانە 129 ونەركاسىپتىك كاسىپورىن تەكسەرىلدى. الدىندا وتكەن «دارمەك» جەدەل- الدىن الۋ ءىس-شاراسىمەن سالىستىرعاندا انىقتالعان اكىمشىلىك قۇقىق بۇزۋشىلىقتاردىڭ %30 عا وسكەنى بايقالادى. ءۇش مىڭ توننادان استام پرەكۋرسورلاردىڭ اينالىمى شەكتەلدى. اتاپ ايتقاندا، بۇل سينتەتيكالىق ەسىرتكىلەردى وندىرۋدە قولدانۋعا بولاتىن قوس ماقساتتاعى تاۋارلار. اكىمشىلىك جاۋاپكەرشىلىككە 191 لاۋازىمدى تۇلعا تارتىلدى، ونىڭ ىشىندە 108 مەديتسينا قىزمەتكەرى. ساقتاۋ شارتتارىن بۇزعانى ءۇشىن 44 مىڭ تابلەتكا جانە 14 مىڭ امپۋلا پسيحواكتيۆتىك پرەپاراتتار اينالىمى شەكتەلدى. ەسىرتكى قۇرالدارىمەن جۇمىس ىستەۋ سالاسىندا بەس قىلمىستىق قۇقىق بۇزۋشىلىق انىقتالدى، - دەدى ءى ءى م ەسىرتكى قىلمىسىنا قارسى ءىس-قيمىل كوميتەتى ءتوراعاسىنىڭ ورىنباسارى قۋاندىق ءالجانوۆ.
مىسالى، باتىس قازاقستان وبلىسىنداعى ونەركاسىپتىك وبەكتىلەرىنىڭ ءبىرىن تەكسەرۋ بارىسىندا ليتسەنزياسىز پايدالانىلعان 14 توننادان استام تۇز قىشقىلى انىقتالىپ تاركىلەندى. اباي وبلىسىنداعى مەديتسينالىق ۇيىمدى تەكسەرۋ كەزىندە ەسىرتكى قۇرالدارىن ساقتاۋ جانە جويۋ قاعيدالارىن بۇزۋ دەرەگى انىقتالدى، وندا 137 امپۋلا پسيحواكتيۆتىك زاتتار تاركىلەندى. فارماتسيەۆتكە قاتىستى قىلمىستىق ءىس قوزعالدى.
«ەسىرتكى قۇرالدارى، پسيحوتروپتىق زاتتار مەن پرەكۋرسورلار اينالىمىمەن اينالىساتىن زاڭدى تۇلعالارعا باقىلاۋداعى زاتتاردى تاسىمالداۋ، ساقتاۋ، پايدالانۋ جانە ساتۋ نورمالارىن ساقتاۋ قاجەت ەكەنىن ايتامىز. ءى ءى م ەسىرتكىنىڭ زاڭدى اينالىمى سالاسىنداعى زاڭنامادا بەلگىلەنگەن تالاپتاردى بۇزعانى ءۇشىن قىلمىستىق كودەكستىڭ 303-بابى بويىنشا قىلمىستىق جاۋاپتىلىق كوزدەلگەنىن ەسكە سالادى، بۇل 600 مىڭ تەڭگەگە دەيىنگى مولشەردە ايىپپۇل نەمەسە 40 تاۋلىككە دەيىن قاماۋعا الۋ تۇرىندەگى جازا»، - دەدى قۋاندىق ءالجانوۆ.
