ءبىز قازاقستاندا تۋدىق، قازاقشا ءومىر ءسۇرىپ، قازاقشا ويلانامىز - راميلا مۋستافايەۆا
تۇركىستان. KAZINFORM - وبلىستىق «گاراباح» ازەربايجان ەتنومادەني بىرلەستىگى» قوعامدىق بىرلەستىگىنىڭ ءتوراعاسى راميلا مۋستافايەۆا قيىن قىستاۋ زاماندا ازەربايجان حالقىن جاتسىنباي باۋىرىنا باسقان قازاق حالقىنا العىس ايتتى.
راميلا مۋستافايەۆانىڭ اتالارى 1937 -جىلى ساياسي جاعدايلارعا بايلانىستى تاۋلى قاراباقتان سوزاق جەرىنە كوشىپ كەلگەن. اناسى تەرىسكەي توپىراعىندا تۋعان. دەگەنمەن، سول كەزدەگى ەكى جاسار ءبۇلدىرشىندى ون ءبىر بالانىڭ ىشىنەن تاڭداپ، قاراباققا قايتا الىپ كەتىپتى. ال، كەيىن ەسەيىپ، وتباسىلى بولعان سوڭ، 1976 -جىلى تۋعان جەرى قازاقستانعا تۇبەگەيلى قونىس اۋداردى.
«ەكىنشى دۇنيەجۇزىلىك سوعىسقا قاتىسىپ، عاسىر جاساپ وتىرعان ناعاشى اتام ءالى كۇنگە دەيىن بىزگە سول ءساتتى كوزىنە جاس الىپ ايتىپ وتىرادى. العاشقىدا بارلىعىمىزدى بۇل ەلگە ءولتىرۋ ءۇشىن اكەلە جاتىر دەپ ويلاعان ەكەن. بىرنەشە كۇنگە سوزىلعان اۋىر ساپاردان ءتىرى قالعانداردى سوزاق اۋدانىنىڭ قازىرگى ورتالىعىنا جەتكىزگەن. ول كەزدە اتام 13 جاستا بولعان. ءبىراق، قازاق حالقى جىلىشىراي تانىتىپ، ىستىق شاي مەن تاماق ۇسىنىپتى. ءبىر ۇيدە ءۇش كۇن قوناق بولىپ، كەيىننەن ءۇيدى-ۇيگە ءبولىنىپ قونىستانعان. ارادا ۋاقىت وتە كەلە قازاق حالقى ءبارىمىزدىڭ باسپانالى بولۋىمىزعا جاردەمدەستى. ولتىرەدى دەپ ويلاعان قازاقتاردىڭ ءبىزدى ءوز باۋىرىنداي كورگەنى جادىمىزدان ماڭگى وشپەيدى»، دەيدى ول.
راميلا مۋستافايەۆا سايرام اۋدانى اكىمدىگىندە ون جىلعا جۋىق قىزمەت ەتكەن. ۇجىممەن ءالى كۇنگە دەيىن تىعىز قارىم-قاتىناستا. قازاقستاندا دوستارى دا كوپ.
«قازىر ءبىز اتامەكەنىمىز - ازەربايجانعا بارساق، ءبىر اپتا وتەر-وتپەس قازاقستانعا قايتقىمىز كەلىپ تۇرادى. ءتىپتى، ول جاقتاعى حالىقتىڭ كەيبىر سوزدەرىن تۇسىنبەي قالاتىن جاعدايلار دا كەزدەسەدى. تىرشىلىگىنە دە ۇيرەنە المايمىز. ويتكەنى، ءبىز قازاقستاندا تۋدىق، وسى ەلدىڭ تاربيەسىن سىڭىردىك، وسى ەلدە ءوسىپ-وندىك جانە ەڭ باستىسى، ءبىز قازاقشا ويلانامىز. ءتىپتى، ازەربايجاندارعا قاراعاندا قازاق دوستارىم كوپ. تاعى ءبىر ايتا كەتەرلىگى، انامنىڭ اپكە- سىڭلىلەرى قازاق، گرۋزين، ازەربايجان، تۇرىك، تاجىك، ەندى ءبىرى شەشەنگە تۇرمىسقا شىققان. ساناپ كورسەم، ءبىزدىڭ اۋلەتىمىزدە سەگىز ءتۇرلى ۇلت وكىلى بار ەكەن. بارشامىز ءبىر اتانىڭ بالالارىنداي تاتۋ ءتاتتى تۇرىپ جاتىرمىز. وسى ورايدا، ءاربىر ۇلتتى جاتسىنباي، تىرشىلىگىن الاڭسىز جاساۋىنا مۇمكىندىك بەرگەن، ءبىزدى باۋىرىنداي كورگەن دارحان كوڭىلدى قازاق حالقىنا العىس ايتامىن!» - دەيدى راميلا مۋستافايەۆا.
اۆتور
قايرات زاينيشەۆ
