ءبىز ۋكراينا داعدارىسىنىڭ بەيبىت شەشىلۋىن قولدايمىز - مۇحاممەد بين سالمان

استانا. KAZINFORM - ۋكراينا پرەزيدەنتى مەن ساۋد ارابياسىنىڭ تاق مۇراگەرى اراسىنداعى كەلىسسوزدە اسكەري قاقتىعىستى توقتاتۋعا باعىتتالعان قادامدار مەن شارتتار تالقىلاندى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ساۋد ارابياسىنىڭ تاق مۇراگەرى جانە پرەمەر-ءمينيسترى مۇحاممەد بين سالمان بين ابدۋلازيز دۇيسەنبى كۇنى ءوز ەلىنىڭ ۋكرايناداعى داعدارىستى شەشۋگە جانە بەيبىتشىلىك ورناتۋعا باعىتتالعان بارلىق حالىقارالىق كۇش-جىگەرىن قولداۋعا دايىن ەكەنىن اتاپ ءوتتى.

بۇل مالىمدەمە دجيددادا ۋكراينا پرەزيدەنتى ۆلاديمير زەلەنسكيمەن كەزدەسۋ كەزىندە ايتىلدى. سونداي-اق ەكىجاقتى قارىم-قاتىناس جايى تالقىلاندى. زەلەنسكي مۇراگەر حانزادا مۇحاممەدپەن كەلىسسوزدەر ەكىجاقتى قارىم-قاتىناسقا، سونداي-اق باسقا سەرىكتەستەرمەن ىنتىماقتاستىققا ارنالعانىن ايتتى. ول تاق مۇراگەرىنىڭ شىنايى بەيبىتشىلىككە جول اشۋعا كۇش سالۋىن جوعارى باعالادى.

- ساۋد ارابياسى ماڭىزدى ديپلوماتيالىق پلاتفورما ۇسىنىپ وتىر جانە ءبىز مۇنى جوعارى باعالايمىز، - دەپ قوستى ول.

ونىڭ ايتۋىنشا، تاق مۇراگەرىمەن كەلىسسوزدەر اسكەري قاقتىعىستى توقتاتۋعا جانە تۇراقتى بەيبىتشىلىكتى قامتاماسىز ەتۋگە كومەكتەسەتىن قادام مەن شارتتارعا قاتىستى. زەلەنسكي تۇتقىنداردى بوساتۋ مەن بالالاردى قايتارۋدىڭ ماڭىزدىلىعىن اتاپ ءوتتى، بۇل سەنىمدى نىعايتۋ شارالارى بولۋى مۇمكىن.

- ءبىز ءوز تاراپىمىزدان كونسترۋكتيۆتى ديالوگقا دايىنبىز جانە قاجەتتى شەشىم مەن قادام تۋرالى تالقىلاپ، كەلىسەمىز دەپ ۇمىتتەنەمىز. ۇستەل ۇستىندە ناقتى ۇسىنىستار ايتىلدى. باستىسى - تەز ءارى ءتيىمدى ارەكەت ەتۋ، - دەپ جازدى زەلەنسكي X الەۋمەتتىك جەلىسىندە.

بۇعان دەيىن ساۋد ارابياسىندا ۋكراينا-امەريكا كەلىسسوزدەرى ءوتىپ جاتقانى حابارلانعان بولاتىن.