ءبىرىنشى رەت وسىنداي جاعدايدى باستان وتكەرىپ وتىرمىز - بەرىك سۇلتان

استانا. قازاقپارات - WBO جانە IBF تۇجىرىمدارى بويىنشا ورتا سالماقتاعى الەم چەمپيونى جانىبەك ءالىمحان ۇلىنىڭ جاڭا زەلانديالىق بوكسشى اندرەي ميحايلوۆيچپەن جەكپە-جەك الدىندا اۋرۋحاناعا ءتۇستى.

وتانداسىمىز سالماق قۋۋ كەزىندە ەسىنەن تانىپ قالعان. بۇل تۋرالى بوكسشىنىڭ مەنەدجەرى بەرىك سۇلتان الەۋمەتتىك جەلىدەگى پاراقشاسىندا جازدى.

- قۇرمەتتى اعايىندار! جەكپە-جەك بولمايدى دەگەن جاڭالىقتى وقىپ سىزدەردىڭ دە كوڭىل كۇيلەرىڭىز تۇسكەنىن بىلەمىز. سەبەبى جاناشىر، تىلەۋلەس ەكەندەرىڭىزدى بىلەمىز. الەمنىڭ تۇكپىر-تۇكپىرىنەن قانشاما جانكۇيەر ونەرىمىزدى كورسەك دەپ اسىعا كۇتتى. ءبىز دە رينگتە Qazaq style دى كورسەتۋ ءۇشىن بارىمىزدى سالىپ دايىندالدىق. دەگەنمەن وزگە سپورتشىلار سەكىلدى ءبىز دە سالماق قۋۋ كەزىندە قيىندىققا تاپ بولدىق. ءبىرىنشى رەت وسىنداي جاعدايدى باستان وتكەرىپ وتىرمىز. وڭاي ەمەس ەكەن. تۇنىمەن اۋرۋحانادا بولدىق. مۇنى دا كورۋ كەرەك بولعان شىعار. قازىر جانىبەكتىڭ جاعدايى ءبىرقالىپتى. دەنساۋلىق ءبىرىنشى ورىندا ەكەنىن بىلەسىزدەر. بۇيىرتسا 2-3-ايدا قالىپقا كەلىپ، رينگكە قايتا ورالامىز. تىلەۋلەس جاندارعا مىڭ العىس. اۋىرماڭىزدار! قۇرمەتپەن، Qazaq style كومانداسى، - دەپ جازدى بەرىك سۇلتان.

ەسكە سالا كەتەيىك، جانىبەك ءالىمحان ۇلى مەن اندرەي ميحايلوۆيچتىڭ جەكپە- جەگى لاس-ۆەگاستە (ا ق ش) 13-شىلدە كۇنى تۇندە ءوتۋى ءتيىس ەدى.

بۇعان دەيىن جانىبەك ەكى بىردەي بەلبەۋگە تالاس الدىندا «جىل نوكاۋتىنا» ۋادە بەرگەنىن جازعان بولاتىنبىز.