ءبىرىڭعاي ۋاقىت بەلدەۋىنە كوشۋگە بايلانىستى اۋە رەيستەرى كەستەسى وزگەرەدى

 استانا. KAZINFORM -ەلىمىزدىڭ ءبىرىڭعاي ۋاقىت بەلدەۋىنە كوشەتىندىگىنە بايلانىستى 1-ناۋرىزدان باستاپ «Qazaq Air» اۋە كومپانياسىنىڭ رەيستەر كەستەسىنە وزگەرىستەر ەنگىزىلەدى.

ۇكىمەتتىڭ 2024 -جىلعى 19-قاڭتارداعى № 20 قاۋلىسىنا سايكەس 5-ساعات بەلدەۋى (UTC +5) قازاقستان رەسپۋبليكاسىنىڭ بۇكىل اۋماعىنا قولدانىلادى. سونداي- اق 2024 -جىلعى 29-اقپاننان 2024-جىلعى 1-ناۋرىزعا قاراعان ءتۇنى (ساعات 00:00 دە) جەرگىلىكتى ۋاقىت 1 ساعاتقا (استانا، الماتى، شىمكەنت قالالارى، اباي، اقمولا، الماتى، جامبىل، جەتىسۋ، قاراعاندى، قوستاناي، پاۆلودار، سولتۇستىك قازاقستان، تۇركىستان، ۇلىتاۋ، شىعىس قازاقستان وبلىستارى) كەيىن شەگەرىلەدى.

وسىعان بايلانىستى، «Qazaq Air» اۋە كومپانياسى كەلەسىنى حابارلايدى:

2024 -جىلدىڭ 29-قاڭتارىنا دەيىن استانا، الماتى، اقتوبە، اتىراۋ، ورال، شىمكەنت، كوكشەتاۋ، قوستاناي، پاۆلودار، پەتروپاۆل، تۇركىستان، قىزىلوردا، وسكەمەن، تالدىقورعان جانە جەزقازعان قالالارىنا/قالالارىنان رەيستەرگە اۋە بيلەتتەرىن ساتىپ العان جولاۋشىلارعا ۇشۋ ۋاقىتى 2024 -جىلدىڭ 1-ناۋرىزىندا 00:01 دەن باستاپ (استانا ۋاقىتى بويىنشا) رەيس بيلەتتە كورسەتىلگەن ۋاقىتتان 1 ساعات بۇرىن ورىندالاتىنىنا نازار اۋدارۋ قاجەت!

«بيىلعى جىلدىڭ 29-قاڭتارىنان كەيىن اۋە بيلەتتەرىن ساتىپ العان جولاۋشىلاردىڭ جوعارىدا اتالعان باعىتتار بويىنشا اۋە بيلەتتەرىندە جاڭا بەلدەۋگە سايكەس ۋاقىت كورسەتىلگەنىن اتاپ وتەمىز. ۇشۋ جانە كەلۋ ۋاقىتىنىڭ وزگەرۋى تۋرالى اقپارات جولاۋشىلارعا SMS- حابارلامالار تۇرىندە جانە اۋە بيلەتتەرىن ساتىپ الۋ كەزىندە كورسەتىلگەن مەكەنجايلارعا ەلەكتروندىق پوشتا ارقىلى جىبەرىلدى»، - دەيدى اۋە كومپانياسىنان.

سۇراقتار تۋىنداعان جاعدايدا جولاۋشىلار 77273531414 ءنومىرلى قولداۋ قىزمەتىنە حابارلاسا الادى.