ءبىرقاتار ىشكى ىستەر ورگاندارىنىڭ باسشىلارى جۇيەلى جەمقورلىق ءۇشىن سوتتالدى

 استانا. KAZINFORM - سىبايلاس جەمقورلىققا قارسى قىزمەت قۇقىق قورعاۋ ورگاندارىنداعى جەمقورلىقتىڭ جولىن كەسۋگە ەرەكشە نازار اۋدارادى. اعىمداعى ايدا ءبىرقاتار ىشكى ىستەر ورگاندارىنىڭ باسشىلارى سوتتالدى.

ءمالىم بولعانداي، وسكەمەن قالاسىنىڭ سوتى قالالىق باسقارمانىڭ اكىمشىلىك پوليتسيا ءبولىمىنىڭ باستىعى ا. ا. تەرنوپولسكيگە جانە باسقا ادامدارعا قاتىستى پارا الۋ فاكتىلەرى بويىنشا ۇكىم شىعاردى.

«ول جۇيەلى نەگىزدە مامانداندىرىلعان تۇراقتاردان اۆتوكولىك قۇرالدارىن زاڭسىز بەرگەنى ءۇشىن 20 دان 50 مىڭ تەڭگەگە دەيىنگى سومادا پارا العان. سوت ۇكىمىمەن وعان «پوليتسيا پودپولكوۆنيگى» ارنايى اتاعىنان ايىرا وتىرا ايىپپۇل سالىندى»، - دەلىنگەن حابارلامادا.

سونىمەن قاتار، وسى ۇكىممەن پاراقورلىققا دەلدالدىق جاساعانى ءۇشىن وسكەمەن ق. پب پاترۋلدىك پوليتسيا باتالونى ۆزۆودىنىڭ كومانديرى ر. ا. بايتانباليەۆ جانە ش ق و پ د ءا پ ب ينسپەكتورى م. ب. ەرباكوۆ، سونداي-اق كومەك كورسەتكەنى ءۇشىن — № 5 ءورت ءسوندىرۋ ءبولىمىنىڭ قاراۋىل باستىعى د. ت. بيەكەنوۆ سوتتالدى.

ايىپپۇلداردىڭ جالپى سوماسى 22 ميلليون تەڭگەدەن استى.

ق ر ق ك 41-بابىنا سايكەس ايىپپۇل بەلگىلەنگەن مەرزىمدە تولەنبەگەن جاعدايدا جازا شاراسى باس بوستاندىعىنان ايىرۋعا اۋىستىرىلادى.

استانا قالاسىنىڭ قىلمىستىق ىستەر جونىندەگى اۋدانارالىق سوتىمەن ەسىل اۋدانى پ ب انىقتاۋ ءبولىمىنىڭ باستىعى ە. جۇمانوۆ 5 جىلعا شارتتى تۇردە سوتتالدى.

ول اۋىر قىلمىس جاساعان ايىپتالۋشىنى قىلمىستىق جاۋاپكەرشىلىكتەن زاڭسىز بوساتقانى جانە دالەلدەمەلەردى بۇرمالاعانى ءۇشىن كىنالى دەپ تانىلدى.

ۇكىمدەر زاڭدى كۇشىنە ەندى.

«اقتوبە وبلىسىنىڭ اۋداندىق سوتىمەن وبلىستىق پوليتسيا دەپارتامەنتى مارتوك اۋداندىق پوليتسيا ءبولىمى باستىعىنىڭ ورىنباسارى ا. م. ەرعاليەۆ 5 جىل 6 ايعا باس بوستاندىعىنان ايىرۋعا سوتتالدى. ول مەملەكەتكە 243 ميلليون تەڭگەدەن استام سوماعا زالال كەلتىرۋگە اكەپ سوققان زاتتاي دالەلدەمەلەردى (612 مىڭنان استام قوراپ تەمەكى) جەكە مەنشىككە زاڭسىز بەرۋ جولىمەن لاۋازىمدىق وكىلەتتىكتەرىن اسىرا پايدالانعانى ءۇشىن كىنالى دەپ تانىلدى»، - دەپ حابارلادى اگەنتتىكتىڭ باسپا ءسوز قىزمەتى.

اقتاۋ قالالىق سوتى وبلىستىق پوليتسيا دەپارتامەنتى كوشى- قون قىزمەتى باسقارماسى باستىعىنىڭ ورىنباسارى ش. قالمۇرزايەۆتى 3 جىل 6 ايعا باس بوستاندىعىنان ايىرۋعا سوتتادى، ول ەل اۋماعىندا بولعان كەزدە جالپى قامقورلىعى ءۇشىن شەتەلدىكتەن 3 ميلليون تەڭگە كولەمىندە پارا العان.

بارلىق سوتتالعان ادامدار ارناۋلى اتاقتارىنان جانە مەملەكەتتىك قىزمەتتە لاۋازىمداردى اتقارۋ قۇقىعىنان ايىرىلدى.

ۇكىمدەر زاڭدى كۇشىنە ەنگەن جوق.