ءبىرقاتار مەملەكەتتىڭ ەلشىلەرى پرەزيدەنتكە سەنىم گراموتاسىن تاپسىردى
استانا. KAZINFORM - «اقوردا» رەزيدەنتسياسىندا جەتى مەملەكەتتىڭ توتەنشە جانە وكىلەتتى ەلشىلەرىنىڭ قازاقستان رەسپۋبليكاسىنىڭ پرەزيدەنتى قاسىم-جومارت توقايەۆقا سەنىم گراموتالارىن تاپسىرۋ ءراسىمى ءوتتى.
سەنىم گراموتالارىن يسپانيا كورولدىگىنىڭ ەلشىسى لۋيس فرانسيسكو مارتينەس مونتەس، ەستونيا رەسپۋبليكاسىنىڭ ەلشىسى ياپ ورا، وزبەكستان رەسپۋبليكاسىنىڭ ەلشىسى باحتيەر يبراگيموۆ، سۋدان رەسپۋبليكاسىنىڭ ەلشىسى مۇحاممەد ءال-گازالي سيررادج، رۋاندا رەسپۋبليكاسىنىڭ ەلشىسى چارلز كايونگا، دومينيكان رەسپۋبليكاسىنىڭ ەلشىسى الەحاندرو ارياس سارسۋەلا جانە ماۆريكي رەسپۋبليكاسىنىڭ ەلشىسى حەسۆار دجانكە تاپسىردى.
مەملەكەت باسشىسى ديپلوماتتار الدىندا ءسوز سويلەدى.
- قازاقستان سىرتقى ساياساتىندا بەيبىتشىلىكتى جاقتايدى، ب ۇ ۇ جارعىسىنىڭ قاعيداتتارىن بەرىك ۇستانادى جانە حالىقارالىق ىنتىماقتاستىققا ءاردايىم اشىق. ءبىز بىرىككەن ۇلتتار ۇيىمىنىڭ جاھاندىق كەڭىستىكتەگى ورنىن ەشقانداي قۇرىلىم الماستىرا المايتىنىنا نىق سەنىمدىمىز. بۇل بىرەگەي ۇيىمدى ءارقاشان قولدايمىز. وسى ورايدا سىزدەردىڭ ەلدەرىڭىزبەن ەكىجاقتى قارىم-قاتىناستى، سونداي-اق كوپجاقتى دەڭگەيدەگى بايلانىستاردى دامىتۋعا نيەتتىمىز. قازاقستان - قارقىندى دامىپ كەلە جاتقان مەملەكەت. ءبىز ەكونوميكامىزدىڭ تۇراقتىلىعىن قامتاماسىز ەتۋگە ۇمتىلىپ وتىرمىز. ارينە، بۇل وڭاي ەمەس. ونىڭ تابىستى بولۋى كوپ جاعدايدا حالىقارالىق ىقپالداستىققا، سونىڭ ىشىندە سىزدەردىڭ ەلدەرىڭىزبەن اراداعى ىنتىماقتاستىقتى دامىتۋعا بايلانىستى، - دەدى پرەزيدەنت.
قاسىم-جومارت توقايەۆ ەلشىلەردى قازاقستانداعى ديپلوماتيالىق ميسسيالارىنىڭ رەسمي باستالۋىمەن قۇتتىقتاپ، ولاردىڭ مەملەكەتتەرىنىڭ باسشىلارىنا ىزگى تىلەگى مەن سالەمىن جولدادى.
