ءبىر ميلليوننان استام جاعداي: قازاقستاندا ۆيرۋستىق ماۋسىم قالاي ءوتىپ جاتىر

مينيسترلىكتىڭ مالىمەتىنشە، 22-28-قازان ارالىعىندا 74689 ج ر ۆ ي جاعدايى تىركەلدى. بۇل وتكەن ەپيدەميولوگيالىق ماۋسىمنىڭ سايكەس كەزەڭىمەن سالىستىرعاندا 44 پايىزعا، ال الدىڭعى اپتامەن سالىستىرعاندا 1,5 ەسە از.

- ەپيدەميولوگيالىق ماۋسىم باستالعالى بەرى 1075450 ج ر ۆ ي جاعدايى تىركەلدى. بۇل وتكەن جىلدىڭ سايكەس كەزەڭىمەن سالىستىرعاندا 4,7 پايىزعا تومەن. زەرتحانالىق مونيتورينگ ناتيجەلەرى بويىنشا اينالىمداعى تۇماۋعا جاتپايتىن ۆيرۋستاردىڭ ىشىندە رينوۆيرۋستار، ادەنوۆيرۋستار جانە بوكاۆيرۋستار باسىم. ماۋسىم باستالعالى بەرى A(H1N1) pdm09 تۇماۋىنىڭ 12 جاعدايى زەرتحانالىق تۇرعىدان راستالدى، - دەيدى ماماندار.

ەلىمىزدە تۇماۋعا قارسى ۆاكتسيناتسيالاۋ جۇمىستارى جالعاسىپ جاتىر. حالىقتىڭ شامامەن 11 پايىزىن ۆاكتسيناتسيالاۋمەن قامتۋعا مۇمكىندىك بەرەتىن «گريپپول®» ۆاكتسيناسىنىڭ 2,2 ملن دوزاسى ساتىپ الىندى. قازىرگى ۋاقىتتا ۆاكتسينا رەسپۋبليكانىڭ بارلىق وڭىرىندە بار.

30-قازانداعى جاعداي بويىنشا 1670447 ادام ەگىلدى نەمەسە ۆاكتسيناتسيالاۋعا جاتاتىن كونتينگەنتتىڭ 75,3 پايىزىن قۇرايدى.

- ج ر ۆ ي ماۋسىمىندا قولدى، اسىرەسە قوعامدىق ورىندارعا بارعاننان كەيىن، ءجيى جۋۋ، بولمەلەردى ۇنەمى جەلدەتۋ جانە رەسپيراتورلىق ادەپ ەرەجەلەرىن ساقتاۋ ۇسىنىلادى. ج ر ۆ ي سيمپتومدارى پايدا بولعان جاعدايدا، مۇمكىندىگىنشە اينالاداعى ادامدارمەن بايلانىستى شەكتەگەن ءجون. دەنە قىزۋى جوعارىلاسا، دەنساۋلىق جاعدايى ناشارلاسا نەمەسە اۋرۋ بەلگىلەرى ايقىن بايقالسا، مەديتسينالىق كومەككە جۇگىنۋ قاجەت، - دەپ ەسكەرتتى ۆەدومستۆو.