ءبىر ۇيدە - 937 ادام: ەلىمىزدە 22 مىڭ شەتەلدىك «رەزەڭكە» پاتەرلەردە تىركەۋدە تۇرعان
استانا. KAZINFORM - باس پروكۋراتۋرانىڭ القا وتىرىسىندا باس پروكۋرور بەرىك اسىلوۆ ميگراتسيا اعىنىنىڭ ۇلعايۋى جاعدايىندا كوشى-قوندى باقىلاپ قانا قويماي، ەلدىڭ ەكونوميكالىق جانە الەۋمەتتىك دامۋىنا ىقپال ەتەتىندەي ەتىپ باعىتتاۋ قاجەت ەكەنىن اتاپ ءوتتى.
مامىر ايىندا مەملەكەت باسشىسى كوشى- قون سالاسىنداعى زاڭنامانى ودان ءارى جەتىلدىرۋگە باعىتتالعان تۇزەتۋلەر ەنگىزەتىن زاڭعا قول قويدى.
بۇل زاڭ ەكسترەميستىك نەمەسە تەرروريستىك ۇيىمدارعا قاتىسى، قىلمىستاردىڭ قايتالانۋى بار ۇيىمداسقان قىلمىستىق توپتارعا جەتەكشىلىك ەتەتىن، كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستار، سونداي-اق قازاقستاندا اۋىر نەمەسە اسا اۋىر قىلمىستار جاساعان جانە حالىقارالىق شارتتار نەگىزىندە ءوز ازاماتتىعى ەلىنە بەرىلگەن ادامداردىڭ كىرۋىنە تىيىم سالۋ ءۇشىن نەگىزدەر تىزبەسىن كەڭەيتتى.
وسىعان بايلانىستى باس پروكۋرور وسى تۇزەتۋلەردى ىسكە اسىرۋ تەتىكتەرىن ازىرلەۋ قاجەتتىگىن اتاپ ءوتتى.
ءوز كەزەگىندە، زاڭسىز كوشى-قون قىلمىستىق جاعدايدى قيىنداتادى، ەلگە راديكالدى، دەسترۋكتيۆتى جانە قىلمىستىق ەلەمەنتتەردىڭ ەنۋ قاۋپىن ارتتىرادى.
وتىرىس بارىسىندا پروكۋرورلىق تەكسەرىستەردىڭ ناتيجەلەرى باياندالدى.
التى وڭىردە (جامبىل، تۇركىستان، سولتۇستىك قازاقستان، قاراعاندى وبلىستارى، الماتى جانە استانا قالالارى) پروكۋرورلار زاڭسىز كوشى-قون ارنالارىن انىقتاپ، سوتقا دەيىنگى تەرگەپ-تەكسەرۋدى باستادى.
مىسالى، قاراعاندى وبلىسىندا حقو، مەديتسينالىق مەكەمەلەر مەن «كومەكشىلەر» دەپ اتالاتىن قىزمەتكەرلەردى قامتيتىن قىلمىستىق توپتىڭ جۇمىسى توقتاتىلدى، ولار اقشا ءۇشىن ەڭبەك شارتتارىن، مەديتسينالىق انىقتامالاردى قولدان جاساپ، تۇرعىن ءۇيدى جالعان تىركەۋدى رەسىمدەگەن.
قورداي اۋدانىندا جامبىل وبلىسى پروكۋراتۋراسىنىڭ ۇيلەستىرۋىمەن 20 پاكىستاندىقتىڭ شەكارانى زاڭسىز كەسىپ وتۋىنە كومەكتەسكەن قازاقستان مەن قىرعىزستاننىڭ ءۇش ازاماتى ۇستالدى.
ونىڭ ءبىرى ميگرانتتاردى كولىكپەن جانە تۇرعىن ۇيمەن قامتاماسىز ەتكەن. ول قازىر سوتتالدى، قالعان ەكەۋىنە قاتىستى ءىس سوتقا جولداندى (م. ەسىمدى ازامات باس بوستاندىعىنان ايىرىلدى، ا. جانە و. ەسىمدى ازاماتتارعا قاتىستى ءىس سوتقا جىبەرىلدى).
پروكۋرورلار جالعان مەكەنجايدا جانە «رەزەڭكە» پاتەرلەردە تىركەلگەن 22 مىڭ شەتەلدىكتى انىقتادى.
استاناداعى ءبىر پاتەردە شەتەلدىكتەردى قوسقاندا 937 ادام تىركەلگەن، ءبىراق وندا ءبىر عانا وتباسى تۇرعان.
الماتى وبلىسىندا وسىنداي 13 مىڭ فاكتى انىقتالدى.
تەكسەرىس ناتيجەسى بويىنشا قۇجاتتاردى قولدان جاساۋعا، شەكارانى زاڭسىز كەسىپ وتۋگە، سوت اكتىلەرىن ورىنداماۋعا جانە باسقا دا بۇزۋشىلىقتارعا بايلانىستى بارلىعى 42 سوتقا دەيىنگى تەرگەپ-تەكسەرۋ باستالدى.
قازىرگى جاعدايدا كوشى- قون پروتسەستەرىن ءتيىمدى باسقارۋ ەلدىڭ قاۋىپسىزدىگىن، تۇراقتىلىعىن جانە دامۋىن قامتاماسىز ەتۋدىڭ نەگىزگى ەلەمەنتىنە اينالادى.
وسىعان بايلانىستى القا قورىتىندىسى بويىنشا شەكارالاردىڭ ينجەنەرلىك-تەحنيكالىق قورعالۋىن نىعايتۋدى، اقپاراتتىق جۇيەلەردى جاڭعىرتۋ مەن ينتەگراتسيالاۋدى، سونداي-اق زاڭنامالىق تۇزەتۋلەردە كوزدەلگەن جاڭا ەرەجەلەردى ىسكە اسىرۋ شارالارىن پىسىقتاۋدى كوزدەيتىن كەشەندى شارالار ازىرلەندى.
