ءبىر رەتتىك پلاستيك ىدىستاردى قولدانۋعا تىيىم سالىندى
جەكسەنبى كۇنى انگليادا ءبىر رەتتىك پلاستماسسا ونىمدەرىن پايدالانۋعا سالىنعان تىيىم كۇشىنە ەندى، دەپ حابارلايدى قازاقپارات BBC ارناسىنا سىلتەمە جاساپ.
جاڭا ەرەجەگە سايكەس، دۇكەندەر مەن مەيرامحانالار بۇدان بىلاي پلاستيكالىق اس قۇرالدارىن، شار تاياقشالار مەن پوليستيرول شىنى-اياق قولدانا المايدى.
ەل ۇكىمەتىنىڭ مالىمدەمەسىنە سايكەس، بۇل شارا «پلاستيك قالدىقتارى مەن قورشاعان ورتانى لاستاۋ ماسەلەسىن شەشەدى».
الايدا كوپ كومپانيالار مۇنداي وزگەرىسكە ءالى تولىققاندى دايىن ەمەس.
ۇكىمەت كەلتىرگەن ستاتيستيكاعا سايكەس، انگليادا جىل سايىن شامامەن 1,1 ميلليارد ءبىر رەت قولدانىلاتىن تارەلكا مەن ءتورت ميللياردتان استام پلاستيكالىق قاسىق-شانىشقى پايدالانىلادى.
ونىڭ باسىم بولىگى قايتا وڭدەۋگە جارامايدى جانە ولاردىڭ بيولوگيالىق ىدىراۋىنا جۇزدەگەن جىلدار قاجەت بولۋى مۇمكىن.
جەكسەنبىدەن باستاپ ەلدە ءبىر رەتتىك پلاستماسسا تاباقتار، توستاعاندار مەن باسقا دا اس ءىشۋ قۇرالدارىنا جاڭا شەكتەۋلەر ەنگىزىلەدى.
قاڭتار ايىندا العاش رەت جاريالانعان جاڭا ەرەجە 2042-جىلعا دەيىن پلاستيك قالدىقتارىن جويۋ جوسپارىنا باعىتتالعان.
قورشاعان ورتانى قورعاۋ ءمينيسترى ۇكىمەت پلاستيك تۇتىكشە مەن ماقتا تاياقشالارىنا تىيىم سالىپ، ءبىر رەتتىك پوليەتيلەن پاكەتىنە الىم جانە ۇلكەن پلاستيكالىق قاپتاما يمپورتىنا سالىق ەنگىزىلگەنىن ايتتى.
