ءبىر قاڭعىباس ءيتتى اسىراۋعا كۇنىنە 5 مىڭ تەڭگە جۇمسالادى - ەكولوگيا ۆيتسە-ءمينيسترى
استانا. KAZINFORM - وتكەن جىلى ەل اۋماعىندا 247 مىڭ قاڭعىباس ءيت اۋلاندى جانە ولاردى زارارسىزداندىرۋعا، ۆاكسينالاۋعا جانە تىركەۋگە شامامەن 20 ميلليارد تەڭگە قاجەت. بۇل تۋرالى ەكولوگيا جانە تابيعي رەسۋرستار ۆيتسە-ءمينيسترى نۇركەن شاربيەۆ ءمالىم ەتتى.
«دەپۋتاتتار بۇرالقى يتتەردى اۋلاپ، ورتاسىنا قايتارماۋدى ۇسىنىپ وتىر، ال قازىرگى زاڭعا سايكەس يتتەردى اۋلايدى، زارارسىزداندىرادى، ۆاكسينا ەگىپ، قايتا ورتاسىنا جىبەرەدى. ەلوردادان وزگە وڭىرلەردە وسى پرينتسيپپەن جۇمىس ىستەپ جاتىر. زاڭداعى جاڭاشىلدىق قاڭعىباس ءيتتى اۋلاپ، 14 كۇن ۇستاۋ، سول ۋاقىت ارالىعىندا يەسى نەمەسە پاناجاي تابىلماسا ءيتتى جويۋ، ال ولەكسەنى جويۋ ۆەتەرينارلىق- سانيتارلىق ءتارتىپ بويىنشا جۇزەگە اسىرىلادى»، - دەدى نۇركەن شاربيەۆ ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتىندە وتكەن «جانۋارلارعا جاۋاپكەرشىلىكپەن قاراۋ تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ ماسەلەلەرىنە ارنالعان دوڭگەلەك ۇستەل بارىسىندا.
سونداي-اق، ۆيتسە-مينيستر بۇرالقى يتتەردى اۋلاپ، ءومىر بويى باعۋ كەرەك دەگەن ۇسىنىستاردىڭ بارىن ايتتى.
«2023 -جىلى 1-قىركۇيەكتەن باستاپ ءۇي جانۋارلارىن يەلەرى تىركەپ، چيپتەۋ نورماسى كۇشىنە ەندى. ەگەر تىركەلگەن، يەسى بار ءيتتى اۋلاعان جاعدايدا، ونى 60 كۇن بويى ۇستايدى جانە يەسىنە الىپ كەتۋىن حابارلايدى. ەۋروپا باسقا دا الەمدى وسى ءتاسىل قولدانىلادى. وتكەن جىلى ەل بويىنشا 247 مىڭ ءيت اۋلاندى. ەگەر اۋلانعان يتتەردى تابيعي جولمەن ولگەنشە اسىراۋ كەرەك بولسا، ولاردى زارارسىزداندىرۋعا، ۆاكسينالاۋ جانە تىركەۋگە شامامەن 20 ميلليارد تەڭگە قاجەت. وبلىستار ۇسىنعان ستاتيستيكاعا سايكەس ءبىر ءيتتى اسىراۋعا كۇنىنە 5000 تەڭگە جۇمسالادى، ال بىلتىر اۋلانعان 247 مىڭ ءيتتى اسىراۋعا 400 ميلليارد تەڭگەنىڭ ۇستىندە قارجى قاجەت ەتەدى»، - دەيدى ول.
ەسكە سالا كەتسەك، جىل باسىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ ەلدى مەكەندەردە بۇرالقى يتتەردىڭ كوبەيۋى تۇرعىندارعا قاۋىپ ءتوندىرىپ وتىرعانىن ايتقان ەدى.
اۆتور
داۋلەت ىزتىلەۋ
