ءبىر ميلليارد جاس ەستۋ قابىلەتىنەن ايىرىلۋى مۇمكىن

استانا. KAZINFORM - د د ۇ بولجامى بويىنشا، 2050 -جىلعا قاراي شامامەن 2,5 ميلليارد ادام ءارتۇرلى ەستۋ ماسەلەلەرىنە تاپ بولادى، دەپ حابارلايدى Kazinform اگەنتتىگى.

د د ۇ-نىڭ رەسەيدەگى وكىلدىگىنىڭ باسشىسى باتىر بەردىكلىچيەۆتىڭ ايتۋىنشا، قازىرگى ۋاقىتتا 1 ميللياردتان استام جاس مۋزىكانى دۇرىس تىڭداماۋ ادەتى سالدارىنان ەستۋ قابىلەتىنەن ايىرىلۋ قاۋپىندە تۇر.

- وتە الاڭداتارلىق جاعداي، 1 ميللياردتان استام جاس اۋديونى دۇرىس تىڭداماعاننىڭ كەسىرىنەن ەستۋ قابىلەتىنەن ايىرىلۋ قاۋپى ءتونىپ تۇر، ال بۇل قاۋىپتىڭ الدىن الۋعا بولادى، - دەدى ول.

ونىڭ ايتۋىنشا، 2050 -جىلعا قاراي جاستاردىڭ شامامەن 2,5 ميللياردى ءارتۇرلى ەستۋ بۇزىلىستارىنا ۇشىراۋى مۇمكىن، ال ولاردىڭ كەمىندە 700 ميلليونىنا ەستۋ قابىلەتىن قالپىنا كەلتىرۋ ءۇشىن ارنايى وڭالتۋ قاجەت بولادى.

ەستۋ قابىلەتىنىڭ جوعالۋىنا باستى سەبەپتەردىڭ ءبىرى - تىم قاتتى دىبىستاردىڭ اسەرى، بۇل ەستۋ جاسۋشالارىنىڭ زاقىمدانۋىنا اكەلۋى مۇمكىن. الايدا، ەستۋ قابىلەتىن جوعالتۋدىڭ %60 دان استام جاعدايىنىڭ الدىن الۋعا بولادى، ەگەر دەر كەزىندە ءتيىستى شارالار قولدانىلسا. ەڭ ءتيىمدى الدىن الۋ شاراسى - دىبىستى قاۋىپسىز دەڭگەيدە تىڭداۋ ەرەجەلەرىن ساقتاۋ.

مۋزىكانى قاۋىپسىز تىڭداۋعا ارنالعان ارنايى دىبىس دەڭگەيى نورمالارى بار، ءبىراق كوپتەگەن جاستار بۇل تالاپتاردى ەلەمەيدى. بۇل ءوز كەزەگىندە ەستۋ قابىلەتىن جوعالتۋ قاۋپىن ارتتىرادى. بۇگىنگى تاڭدا الەم حالقىنىڭ شامامەن %5 ى ەستۋ قابىلەتىنىڭ جوعالۋىنان مۇگەدەكتىككە ۇشىراپ وتىر.