ءبىر جىل رينگكە شىقپاعان گولوۆكين بوكس قولعابىن شەگەگە ىلە مە
مەكسيكالىق Izquierdazo.com سايتى 41 جاستاعى ورتا سالماقتاعى بۇرىنعى الەم چەمپيونى گەننادي گولوۆكين مانسابىن اياقتاۋى مۇمكىن ەكەنىن جازدى. Kazinform بۇل تۋرالى Sports.kz پورتالىنا سىلتەمە جاساپ حابارلايدى.

ايتا كەتەيىك، GGG 2022 -جىلدىڭ 17- قىركۇيەگىندە مەكسيكالىق بوكسشى ساۋل «كانەلو» الۆارەستەن جەڭىلىپ قالعان بولاتىن. تريلوگيالىق جەكپە- جەكتە ۇپاي سانىمەن قارسىلاسىنا ەسە جىبەرگەننەن كەيىن وتانداسىمىز شارشى الاڭ تورىنە قايتا كوتەرىلگەن جوق.
«شەتەلدىك ب ا ق بەتتەرىندە گولوۆكيننىڭ كاسىپقوي بوكسقا قايتا ورالۋى تۋرالى ءتۇرلى قاۋەسەت جەلدەي ەسىپ ءجۇر. بوكس ماماندارى مەن ساراپشىلار ونىڭ شارشى الاڭعا ورالمايتىنىن جانە 41 جاسىندا بوكس قولعابىن شەگەگە ىلەتىنىن بولجاپ وتىر.
دەگەنمەن گەنامەن جەكپە- جەككە شىعۋعا ءالى دە ۇمىتتەنىپ جۇرگەن بوكسشىلار كوپ. بىرنەشە اي بۇرىن GGG حايمە مۋنگۋيانىڭ تاياۋداعى باستى قارسىلاستارىنىڭ ءبىرى رەتىندە اتالعان. كۇنى كەشە ونىمەن دجون رايدەر جۇدىرىقتاسقىسى كەلەتىنىن ايتتى. ءبىراق گولوۆكين بوكستاعى بولاشاعى تۋرالى ءالى ەشقانداي مالىمدەمە جاساعان جوق»، - دەلىنگەن ماقالادا.