ءبىر جاسقا دەيىنگى بالالارعا قانداي ەكپەلەر سالىنۋ كەرەك
استانا. قازاقپارات - №11 قالالىق ەمحانانىڭ بالالار بولىمشەسىنىڭ مەڭگەرۋشىسى ءمولدىر يبراگيموۆا ۆاكتسيناتسيالاۋدىڭ بالانىڭ ءومىرىنىڭ العاشقى جىلدارىندا اسا ماڭىزدى ەكەنىن جانە قازاقستاننىڭ پروفيلاكتيكالىق ەكپەلەرىنىڭ ۇلتتىق كۇنتىزبەسىندە قانداي ەكپەلەر كوزدەلگەنىن ايتىپ بەردى.
ۆاكتسيناتسيالاۋ ينفەكتسياعا تاپ بولعانعا دەيىن يممۋنيتەت قالىپتاستىرۋعا كومەكتەسىپ، اۋرۋلاردىڭ اۋىر ءوتۋى مەن اسقىنۋ قاۋپىن تومەندەتەدى.
بالانىڭ ءومىرىنىڭ العاشقى كۇندەرىندە تۋبەركۋلەزگە (ب ت س ج) جانە ۆ ۆيرۋستىق گەپاتيتىنە قارسى ەكپەلەر جاسالادى.
ال 2، 3 جانە 4 ايىندا كوكجوتەلگە، ديفتەرياعا، سىرەسپەگە، پوليوميەليتكە، Hib-ينفەكتسياسىنا جانە پنيەۆموكوكك ينفەكتسياسىنا قارسى ۆاكتسيناتسيالاۋ جۇرگىزىلەدى.
- ۆاكسيناتسيالاۋ مەرزىمدەرىن ساقتاۋ جانە جوسپارلى ەكپەلەردى وتكىزىپ الماۋ ماڭىزدى. اتا-انالاردىڭ سۇراقتارى نەمەسە كۇمانى بولسا، ولاردى مىندەتتى تۇردە دارىگەرمەن تالقىلاعان ءجون. ۆاكسيناتسيالاۋ - بالانى بۇگىن جانە بولاشاقتا قورعاۋدىڭ ماڭىزدى جولى،-دەدى ءمولدىر يبراگيموۆا.
ايتا كەتەيىك، بۇعان دەيىن قازاقستاندا پروفيلاكتيكالىق ەكپەلەردىڭ ۇلتتىق كۇنتىزبەسىنە وزگەرىستەر ەنگىزىلگەنى حابارلانعان. سونىڭ ىشىندە ادام پاپيللوما ۆيرۋسىنا قارسى ۆاكتسيناتسيالاۋ ۇلتتىق ەكپە كۇنتىزبەسىنە ەنگىزىلدى.
