ءبىر ءولىپ، ءبىر ءتىرىلدىم: وزگە جۇرەكپەن ءومىر ءسۇرىپ جاتقان ەلوردا تۇرعىنى

استانا. KAZINFORM - گۇلميرا سمايلوۆانىڭ ماماندىعى پەداگوگ- پسيحولوگ، قازىر ول ەلورداداعى جۇرەك ورتالىعىندا جۇمىس ىستەيدى. 36 جاستاعى استانا تۇرعىنىنىڭ وسىدان 10 جىل بۇرىن جۇرەگى اۋىستىرىلدى. Kazinform ءتىلشىسى وزگە جۇرەك يەسىن اڭگىمەگە تارتقان ەدى.

- بيىل 1-ماۋسىمدا مەنىڭ جۇرەگىمدى اۋىستىرعانىنا 10 جىل بولادى. مەندە جۇرەك اقاۋى 2010 -جىلى باستالدى، 2011 -جىلى استانا قالاسىنا ەمدەلۋگە كەلدىم، سول كەزدە دارىگەرلەر جۇرەك اۋىستىرۋ كەرەك دەپ بىردەن ايتتى. ءبىراق ول كەزدە قازاقستاندا جۇرەك وتاسى جوق جانە قاشان بولاتىنىن بىلمەدىك. سوسىن ماعان اپپارات قويدى، ياعني جاساندى جۇرەك، سونىمەن 3,5 جىل ءجۇردىم، وسى ۋاقىت ارالىعىندا مەنى دونور تابىلدى دەپ ءتورت رەت شاقىردى، ءبىراق جۇرەكتى سالۋعا تۋىستارى رۇقسات بەرمەي وتا جاسالمادى. جالپى دونور تابىلعاندا ءبىر عانا ەمەس، بىرنەشە ادامدى شاقىرادى جانە جۇرەكتىڭ كىمگە كەلەتىنىن كورەدى. ارينە، جۇرەك اۋىستىرۋ كەرەك دەگەندە قورقىنىش بولدى، سول ءۇشىن دە ەلورداعا كوشىپ كەلدىك، - دەدى گۇلميرا سمايىلوۆا.

بىرنەشە جىل جاساندى جۇرەكپەن ءومىر سۇرگەن گۇلميراعا 2015 -جىلى جۇرەك دونورى تابىلىپ، وتا جاسالدى. سودان بەرى جاڭا جۇرەكپەن ءومىر ءسۇرىپ جاتىر.

- دونور اقتوبە قالاسىنان، ەر ادام، ارينە، الدىمەن اللاھتىڭ جازۋىمەن جانە دونوردىڭ تۋىستارىنىڭ رۇقسات بەرۋىمەن جاڭا جۇرەككە يە بولدىم. جارىق ءومىردى وتباسىممەن بىرگە ءسۇرىپ جاتىرمىن. وتا ەلورداداعى جۇرەك ورتالىعىندا تەگىن جاسالدى. وتا قيىن، ءبىر ءولىپ، ءبىر ءتىرىلدىم، كوپ ءدارى ىشەمىز. كۇتىمگە كەلسەك، دۇرىس تاماقتانۋ جانە سپورتپەن شۇعىلدانعان ابزال، ءجيى جاياۋ جۇرگەن پايدالى. جىلىنا ءبىر رەت كارديولوگيالىق ەم الىپ تۇرامىن، جاقىندا عانا كەزەكتى ەم الدىم. وتباسىم بار، جالعىز ۇلىمدى تاربيەلەپ وتىرمىن، - دەيدى ول.

گۇلميرا سمايىلوۆاعا «ەر ادامنىڭ جۇرەگىمەن ءومىر ءسۇرۋ قالاي ەكەن، قانداي سەزىمدەسىز؟» دەگەن ساۋال ءجيى قويىلادى ەكەن.

- بۇل سۇراق ءجيى قويىلادى، ياعني ەر ادامنىڭ جۇرەگى عوي، مۇمكىن ەر ادامنىڭ مىنەز-قۇلقى، قىلىقتارى پايدا بولدى ما دەيدى. ءبىراق ەشقانداي وزگەرىس جوق، سول باياعى ءوز قالپىم. ەندىگى ارمانىم، ءبىر ءولىپ-تىرىلگەننەن كەيىن پايدالى، ماعىنالى ءومىر سۇرگىم كەلەدى. دونور مەن ونىڭ جاقىندارىن دا ويلايمىن. سەبەبى ولار ماعان كەلىسىمىن بەردى، مەن جاۋاپتىمىن، - دەپ تولعاندى جاڭا جۇرەك يەسى.

ايتا كەتسەك، وسى كۇنگە دەيىن ەلىمىزدە ءجۇز ادامعا دونورلىق جۇرەك قويىلدى. العاش ەلىمىزدە جۇرەك ترانسپلانتاتسياسى 2012 -جىلى 38 جاستاعى پاتسيەنتكە جاسالدى. وسى ورايدا بىرەر كۇن بۇرىن ەلوردادا «قازاقستانداعى 100- جۇرەك ترانسپلانتاتسياسى» فورۋم ءوتتى.

ەسكە سالا كەتسەك، قازاقستاندا ترانسپلانتاتسيا جاسالاتىن ورگانعا ارنالعان اپپارات سىناقتان ءوتىپ جاتىر. ونىڭ كومەگىمەن دونورلىق ورگانداردى ءبىر وڭىردەن ەكىنشى وڭىرگە قاۋىپسىز ءارى جىلدام جەتكىزۋ مۇمكىندىگى بار.

ەلىمىزگە تانىمال دارىگەر يۋري پيا ترانسپلانتاتسيا تەك مەديتسينا ماسەلەسى ەمەس، قوعامنىڭ ورتاق پروبلەماسى دەيدى. ونىڭ ايتۋىنشا، قازاقستاندا ورتا ەسەپپەن العاندا 1 ميلليون ادامعا كەمىندە 10 ترانسپلانتاتسيا قاجەت.

اۆتور

داۋلەت ىزتىلەۋ