ءبىر اۆتورلىق پاراققا - 510 مىڭ تەڭگە: قالامگەرلەرگە بۇرىن شىقپاعان كىتابى ءۇشىن گرانت بەرىلۋى مۇمكىن

استانا. KAZINFORM - مادەنيەت جانە اقپارات مينيسترلىگى Kazinform ساۋالىنا جولداعان جاۋابىندا قالامگەرلەردى بيۋدجەت ەسەبىنەن ىنتالاندىرۋدىڭ جاڭا فورماتتارى تۋرالى مالىمەت ۇسىندى.

«مينيسترلىكتىڭ ارحيۆ، قۇجاتتاما جانە كىتاپ ءىسى كوميتەتى قازىرگى تاڭدا قالامگەرلەرگە گرانت تاعايىنداۋ ماسەلەسىن قاراستىرۋدا. بۇگىندە قاعيدالارعا تۇزەتۋلەر مەن تولىقتىرۋلار ەنگىزىلۋدە. قاعيدالار جوباسى اشىق نورماتيۆتىك قۇقىقتىق اكتىلەردىڭ ينتەرنەت پورتالىندا تالقىلانۋ ءۇشىن جاريالانعان. قازىرگى تاڭدا قاعيدالار جوباسى ءتيىستى مەملەكەتتىك ورگانداردىڭ ماقۇلداۋىنا جىبەرىلدى. قاعيدالار كۇشىنە ەنگەن جاعدايدا گرانت قالامگەرلەردىڭ بۇرىن جاريالانباعان كىتاپتارىنا تاعايىندالادى. گرانت مولشەرى ءبىر اۆتورلىق پاراققا (40 مىڭ سيمۆولعا) 6 ەڭ تومەنگى جالاقى مولشەرىندە (2024 -جىلعى ەڭ تومەنگى ايلىق مولشەرىمەن ەسەپتەگەندە 510 مىڭ تەڭگە بولادى — رەد. ) قاراستىرىلعان»، - دەپ جازادى مينيسترلىكتەگىلەر.

ۆەدومستۆو جاۋابىندا شىعارماشىلىق وكىلدەرىنە مەملەكەتتىك ستيپەنديالار بەرىلەتىنى دە ايتىلعان.

«بىلتىر پرەزيدەنت وكىمىمەن 75 مادەنيەت جانە ونەر قايراتكەرىنە مادەنيەت سالاسىنداعى مەملەكەتتىك ستيپەنديا تاعايىندالدى»، - دەلىنگەن جاۋاپتا.