ءبىر اپتادا 10 مىڭعا جۋىق الماتىلىق ج ر ۆ ي-مەن اۋىردى

الماتى. KAZINFORM - الماتىدا جەدەل رەسپيراتورلىق ۆيرۋستىق ينفەكسيا جۇقتىرعاندار بويىنشا ەپيدەميولوگيالىق احۋال قالىپتى. بۇل تۋرالى قالانىڭ سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا ءمالىم ەتتى.

ەپيدەميولوگتىڭ ايتۋىنشا، وتكەن اپتادا ج ر ۆ ي جۇقتىرعان 9890 ادام تىركەلگەن. بۇل - بىلتىرعى جىلدىڭ وسى كەزەڭىمەن سالىستىرعاندا %9,8 عا تومەن.

جاڭا ەپيدەميولوگيالىق ماۋسىم باستالعالى تۇماۋدىڭ A/h3n2 ءتيپتى ۆيرۋسى تارالعان، تۇماۋمەن سىرقاتتانۋشىلىقتىڭ 232 جاعدايى تىركەلدى. سونداي-اق، Covid-19-عا ناۋقاستاردان 290 سىناما الىنىپ زەرتتەلدى، ونىڭ ىشىندە 58 ى وڭ ناتيجە كورسەتتى.

«تاۋەكەل توبىنداعى» ادامداردى ۆاكسيناتسيالاۋ ءۇشىن 210000 دوزا مولشەرىندە ءۇش ۆالەنتتى تۇماۋعا قارسى «گريپپول پليۋس» ۆاكسيناسى ساتىپ الىندى. تۇماۋعا قارسى ۆاكسيناتسيا قىركۇيەك ايىنان باستالىپ، قاراشا ايىنىڭ اياعىنا دەيىن جالعاسادى»، - دەدى ول.

ايتۋىنشا، قالاداعى ەمدەۋ مەكەمەلەرى ەپيدەميولوگيالىق ماۋسىمعا دايىن. تۇماۋعا قارسى پرەپاراتتار مەن مەديتسينالىق ماسكالار قورى جەتكىلىكتى.

وسىعان دەيىن سپيكەر الماتىدا كوروناۆيرۋسقا قارسى ۆاكسينالار جوق ەكەنىن ايتقان بولاتىن.

بۇدان بولەك ەمدەۋ مەكەمەلەرى كۇشەيتىلگەن جۇمىس رەجيمىنە كوشەتىنى تۋرالى جازعان ەدىك.

اۆتور
دوسبول اتاجان