ءبىر ۋاقىتتا 2 ميلليونعا جۋىق وقۋشى اسىق اتىپ وينادى
بۇگىن ەلىمىزدەگى جەتى مىڭنان استام ءبىلىم بەرۋ ۇيىمىندا ءبىر مەزەتتە "التىن ساقا" ۇلتتىق ويىنداردىڭ رەسپۋبليكالىق چەللەندجى ءوتتى.
بۇل باستاما بۇكىل وقۋشىلار مەن مۇعالىمدەردى بىرىكتىرۋگە، ۇلتتىق رۋحتى جانە قوعامداعى تۇراقتىلىقتى نىعايتۋعا باعىتتالعان. ەلوردالىق وقۋشىلاردىڭ سايىسىنا عاني بەيسەمبايەۆ تا قاتىستى، دەپ حابارلايدى Kazinform.
وقۋ- اعارتۋ ءمينيسترى ۇلتتىق ويىندارىمىزدى جاڭعىرتۋ، ناسيحاتتاۋ جانە دامىتۋ ءبىزدىڭ مىزعىماس قۇندىلىقتارىمىزدى - بىرلىك، كەلىسىم مەن بەيبىتشىلىكتى نىعايتاتىنىن، سونداي- اق ءبىلىم وشاقتارىنداعى رۋحاني- ادامگەرشىلىك مادەنيەتتى ارتتىرا تۇسەنىن اتاپ ءوتتى.
«ۇلتتىق ويىندار — پەداگوگيكانىڭ ءداستۇرلى قۇرالى. عاسىرلار بويى ولاردا ۇلتتىق بولمىسىمىز، حالىقتىڭ ەڭبەگى، ار- نامىس، ەر جۇرەكتىلىك، باتىرلىق، ەرىك- جىگەر مەن جەڭىسكە دەگەن ۇمتىلىسى ايقىن كورىنىس تاپقان. ۇلتتىق ويىنداردىڭ وسكەلەڭ ۇرپاق اراسىندا كەڭ تانىلىپ كەلە جاتقانى قۋانتادى. سونىڭ ءبىر دالەلى رەتىندە، بۇگىن ەكى ميلليونعا جۋىق وقۋشى ەلىمىزدىڭ مادەني مۇراسىن ساقتاۋداعى بىرلىگىن تاعى دا كورسەتتى. ءبىز جاس ۇرپاقتى ناعىز پاتريوت رەتىندە تاربيەلەۋىمىز كەرەك»، - دەپ اتاپ ءوتتى ەلىمىزدىڭ باس ۇستازى.
مەملەكەت باسشىسىنىڭ ۇلتتىق قۇرىلتايدىڭ «ادىلەتتى قازاقستان - ادال ازامات» اتتى ەكىنشى وتىرىسىندا ايتقان ماڭىزدى ماقساتتارىنىڭ بىرىنە قول جەتكىزۋ ءۇشىن مينيسترلىك جالپىادامزاتتىق جانە ۇلتتىق قۇندىلىقتار، پاتريوتيزم مەن ەڭبەكقورلىق، ەتنومادەني تولەرانتتىلىق قاعيداتتارىنا نەگىزدەلگەن «ءبىرىڭعاي ۇلتتىق تاربيە باعدارلاماسى» اياسىندا ءبىرقاتار شارالاردى جۇزەگە اسىرىپ جاتىر.
بۇل شارالاردىڭ بارلىعى ەلىمىزدەگى ءبىلىم مەكەمەلەرىن بىرىكتىرۋگە جانە ءبىلىم الۋشىلاردىڭ قازاقتىڭ تاريحى مەن مادەنيەتىنە قىزىعۋشىلىعىن ارتتىرۋعا باعىتتالعان.
