ءبىر اقتالىپ، قايتا قامالدى: اتىراۋ م ءو ز-دىڭ ەكس-باس ديرەكتورىنا تۇپكىلىكتى ۇكىم شىقتى
اتىراۋ وبلىستىق سوتىنىڭ قىلمىستىق ىستەر جونىندەگى القاسى اتىراۋ مۇناي وڭدەۋ زاۋىتىنىڭ ەكس-باس ديرەكتورى د. مەن ساتىپ الۋ دەپارتامەنتتىڭ بۇرىنعى ديرەكتورى س. -عا قاتىستى ۇكىم شىعاردى، دەپ حابارلايدى Kazinform.
وبلىستىق سوتتىڭ باسپا ءسوز قىزمەتىنەن ءمالىم ەتكەندەي، سوتتالۋشىلارعا ق ر قىلمىستىق كودەكسىنىڭ 361-بابىنىڭ 4-بولىگى 3-تارماعىمەن ايىپ تاعىلدى.
پروكۋرور سوتتالۋشى د. -نى مەملەكەتتىك قىزمەت اتقارۋ قۇقىعىنان ءومىر بويىنا ايىرا وتىرىپ، باس بوستاندىعىن 7 جىلعا شەكتەۋ، ال س. -نى مەملەكەتتىك قىزمەت اتقارۋ قۇقىعىنان ءومىر بويىنا ايىرا وتىرىپ، باس بوستاندىعىن 6 جىل 6 ايعا شەكتەۋ تۋرالى سۇرادى.
ال ادۆوكاتتار د. مەن س. -نىڭ ءىس-ارەكەتتەرىندە قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى ولاردى اقتاۋدى سۇرادى. سوتتالۋشىلار دا وزدەرىنىڭ كىناسىز ەكەندىگىن ءبىلدىردى.
سوت القاسى سوتتالۋشىلارعا جازا تاعايىنداۋ كەزىندە ق ر قىلمىستىق كودەكسىنىڭ 55-بابىنىڭ تالاپتارىن ەسكەرگەن.
«سوتتالۋشىلاردىڭ كىناسى قىلمىستىق ءىس ماتەريالدارىمەن تولىق دالەلدەندى. ولار ايىپ تاعىلعان باپپەن كىنالى دەپ تانىلدى. قىلمىستىق ىستەر جونىندەگى سوت القاسىنىڭ ۇكىمىمەن د. -عا مەملەكەتتىك قىزمەتتە لازۋازىمدى اتقارۋ قۇقىعىنان ءومىر بويىنا ايىرۋ، باس بوستاندىعىن 4 جىل 6 اي مەرزىمگە شەكتەۋ جازاسى تاعايىندالدى. ال س. -نىڭ باس بوستاندىعى 3 جىل 6 ايعا شەكتەلدى. ول دا مەملەكەتتىك قىزمەتتە لازۋازىمدى اتقارۋ قۇقىعىنان ءومىر بويىنا ايىرىلدى»، - دەدى وبلىستىق سوتتىڭ باسپا ءسوز قىزمەتىنەن.
ەسكە سالايىق، بيىلعى مامىردا اتىراۋ قالاسىنىڭ №2-سوتىنىڭ ۇكىمىمەن اتىراۋ مۇناي وڭدەۋ زاۋىتىنىڭ بۇرىنعى باس ديرەكتورى د. اقتالىپ شىققان بولاتىن.
كەيىن جوعارعى سوتتىڭ قىلمىستىق ىستەر جونىندەگى سوت القاسى زاۋىتتىڭ ەكس-باس ديرەكتورىنا قاتىستى اقتاۋ تۋرالى ۇكىمنىڭ كۇشىن جويىپ، ءىستى قايتا قاراۋعا جىبەردى.
وسىعان بايلانىستى قاراشادا وبلىستىق سوتتىڭ قىلمىستىق ىستەر جونىندەگى سوت القاسىندا اتىراۋ مۇناي وڭدەۋ زاۋىتىنىڭ ەكس-باس ديرەكتورىنا قاتىستى ءىس قايتا قارالا باستادى.
قىلمىستىق ءىستى قايتا قاراۋ كەزىندە سوت القاسىنىڭ قاۋلىسىمەن اتىراۋ مۇناي وڭدەۋ زاۋىتىنىڭ بۇرىنعى باس ديرەكتورى قاماۋعا الىندى.
