ءبىر پالاتالى پارلامەنت پارتيالاردىڭ ءرولىن كۇشەيتەدى - دەپۋتات
استانا. KAZINFORM - ءبىر پالاتالى پارلامەنت - قۇرىلتاي قازاقستانداعى پارتيالىق قۇرىلىمدى ءتيىمدى ەتۋگە ىقپال ەتەدى.
بۇل تۋرالى ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتورايىمى ايگۇل قۇسپان Jibek Joly تەلەارناسىنداعى «ۋادە» باعدارلاماسىندا ايتتى.
- مەنىڭ ويىمشا، دەپۋتاتتارى تەك پروپورتسيونالدى جۇيە بويىنشا سايلاناتىن ءبىر پالاتالى پارلامەنت ساياسي پارتيالاردى ايتارلىقتاي كۇشەيتەدى، - دەدى ايگۇل قۇسپان.
دەپۋتات اتاپ وتكەندەي، كەيىنگى جىلدارى قازاقستاندا پارتيالىق قۇرىلىس ءالسىز بولدى. كەيبىر پارتيالار ىشكى كەلىسپەۋشىلىكتەر مەن بىتىراڭقىلىققا ۇشىراپ، بۇل ولاردىڭ تۇراقتىلىعىنا كەرى اسەرىن تيگىزدى.
سونىمەن قاتار، سپيكەر AMANAT پەن «اق جول» پارتيالارىنان باسقا ساياسي پارتيالاردىڭ سالىستىرمالى تۇردە «جاس» ەكەنىن جانە ايماقتاردا جەتكىلىكتى وكىلدىككە يە ەمەستىگىن اتاپ ءوتتى.
ايگۇل قۇسپاننىڭ پىكىرىنشە، ەگەر پارلامەنت پروپورتسيونالدى جۇيە بويىنشا قۇرىلسا، پارتيالار وزدەرىنىڭ ايماقتىق قۇرىلىمدارىن كۇشەيتەدى، قولداۋشىلارىن كوبەيتەدى جانە زاڭ شىعارۋشى ورگانعا ءوتۋ ءۇشىن باسەكەگە قابىلەتتىلىگىن ارتتىرادى.
دەپۋتات سونداي-اق پارلامەنتتە پارتيالاردىڭ كەڭىرەك وكىلدىگى يدەياسىنا قولداۋ ءبىلدىردى.
ايتا كەتەيىك، قازاقستاندىقتار 15-ناۋرىزداعى رەفەرەندۋمدا جاڭا كونستيتۋتسيا جوباسىن قولداسا، ەلدە ءبىر پالاتالى پارلامەنت - قۇرىلتاي ءوز جۇمىسىن باستايدى.
