ءبىر اككاۋنت ءۇشىن 10 جىلعا سوتتالۋىڭىز مۇمكىن
استانا. قازاقپارات - Kolesa Group پەن باس پروكۋراتۋرا ينتەرنەت-الاياقتارعا قارسى كۇرەستى كۇشەيتتى. سونىڭ ارقاسىندا Kolesa.kz تەگى مىڭنان استام الاياقتىق اككاۋنت بۇعاتتالدى.
باس پروكۋراتۋرا حابارلاندىرۋلاردى ورنالاستىرۋعا ارنالعان ونلاين-پلاتفورمالارمەن تۇراقتى تۇردە بايلانىس ورناتىپ، ءوزارا ءىس-قيمىلدى جۇزەگە اسىرىپ كەلەدى.
«Kolesa Group» كومپانياسىمەن بىرلەسكەن جۇمىس اياسىندا جارناما الاڭدارىندا ازاماتتاردى الداۋ ءۇشىن پايدالانىلعان 1 مىڭنان استام الاياقتىق اككاۋنت پەن حابارلاندىرۋ بۇعاتتالدى.
ءوزارا ءىس-قيمىلدى ودان ءارى نىعايتۋ ماقساتىندا باس پروكۋراتۋرا مەن «Kolesa Group» ينتەرنەت-الاياقتىققا قارسى ءىس-قيمىل جونىندەگى ىنتىماقتاستىق تۋرالى مەموراندۋمعا قول قويدى.
تاراپتار اقپاراتپەن جەدەل الماسىپ، قىلمىستىق ىستەردى تەرگەپ-تەكسەرۋ بارىسىندا قاجەتتى دەرەكتەردى ۇسىنىپ، سونداي-اق الاياقتىق اككاۋنتتار مەن حابارلاندىرۋلاردى بۇعاتتاۋ جونىندە شارالار قابىلدايتىن بولادى.
بۇل قىلمىستارعا قاتىسى بار ادامداردى نەعۇرلىم جىلدام انىقتاۋعا جانە ولاردىڭ قىلمىستىق ارەكەتتەرىنىڭ جولىن كەسۋگە مۇمكىندىك بەرەدى.
باس پروكۋراتۋرا جارناما الاڭدارىنىڭ پايدالانۋشىلارىن ءوز اككاۋنتتارى مەن دەرەكتەرىن الاياقتارعا بەرۋدىڭ جاۋاپتىلىعى تۋرالى ەسكەرتەدى.
- ەگەر ولاردىڭ قانداي ماقساتتا پايدالانىلاتىنىن بىلمەسەڭىز، باسقا ادامداردىڭ ءوتىنىشى بويىنشا ەسەپتىك جازبالار اشىپ، حابارلاندىرۋلار ورنالاستىرماڭىز. مۇنداي جاعدايدا اككاۋنت يەسى الاياقتىققا كومەكتەسۋشى رەتىندە قىلمىستىق جاۋاپتىلىققا تارتىلۋى مۇمكىن. بۇل ءۇشىن 10 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن، - دەپ ءتۇسىندىردى ماماندار.
