ءبىر ادامنىڭ 82 ءتىسى «ەمدەلگەن» - دەپۋتات مەديتسينالىق ساقتاندىرۋ كەمشىلىكتەرى تۋرالى
استانا. KAZINFORM - مىندەتتى الەۋمەتتىك مەديتسينالىق ساقتاندىرۋدىڭ قازىرگى مودەلى مەديتسينانى حالىققا قولجەتىمسىز ەتىپ، شىعىندى كوبەيتىپ، قاراجاتتىڭ ءتيىمسىز جۇمسالۋىنا اكەلىپ وتىر. بۇل پىكىردى ءماجىلىس دەپۋتاتى اسحات ايماعامبەتوۆ ايتىپ، جۇيەنىڭ كەمشىلىكتەرىن سىنعا الدى.

− م ءا م س بويىنشا 5-ايلىق بالانىڭ ءتىسى قانقۇرتتان ەمدەلگەن. بەس ايىندا ءتىسى شىقپاعان بالانى قالاي ەمدەۋگە بولادى؟ باسقا ءبىر ادامنىڭ 82 ءتىسى ەمدەلگەن، سوعان قاراجات تولەسىن دەپ قورعا ەسەپ بەرىلگەن. سوسىن ءبىر كۇندە ءبىر ادامعا ءبىر اۋرۋحانا 32 قىزمەت كورسەتتىك دەپ ەسەپ تولتىرعان. م ءا م س قارجىلاندىرۋ جۇيەسىنىڭ ءوزى ارتىق قىزمەت كورسەتۋ مەن «قوسىپ جازۋعا» يتەرمەلەيدى. سەبەبى قاراجات ءار ەمدەلگەن جاعدايعا ەمەس، ءار قىزمەتكە تولەنەدى، - دەيدى اسحات ايماعامبەتوۆ.
ونىڭ ايتۋىنشا، جۇيەدە نورماتيۆتەر مەن سيفرلاندىرۋ جوق، ال كلينيكالىق حاتتامالار مەن ستاندارتتار انىق ەمەس.
− تاعى ءبىر دالەل، بۇرىن وستەوحوندروزدى رەنتگەنسىز دە انىقتايتىن. كەيىن رەنتگەن قولدانىلا باستالدى. جارايدى، دۇرىس. ال ەندى قازىر وستەوحوندروزدى انىقتاۋ ءۇشىن ءبىر ناۋقاسقا رەنتگەن، ودان كەيىن ك ت، سوسىن م ر ت جانە باسقا دا قوسىمشا تەكسەرۋلەر تاعايىندالادى. بۇنىڭ ءبارى اقشا تابۋدىڭ «زاڭدى» جولى. سەبەبى ايتپاسا دا تۇسىنىكتى. نەعۇرلىم كوپ قىزمەت كورسەتىلسە، كلينيكا سوعۇرلىم كوپ پايدا تابادى. «وسىنداي بەيبەرەكەتسىزدىك بىرەۋگە ءتيىمدى بولىپ وتىر ما؟» دەگەن ويدا قالاسىڭ، - دەيدى ءماجىلىس دەپۋتاتى.
بۇگىن ءماجىلىس ءتوراعاسىنىڭ ورىنباسارى دانيا ەسپايەۆا ۇكىمەت ساعاتىندا ادامداردىڭ مەديتسينالىق قىزمەتتەردىڭ كورسەتىلۋىنە قاناعاتتانۋ دەڭگەيى تومەندەگەنىن، م ءا م س- كە قاتىستى بەرىلگەن ناقتى ۇسىنىستار ورىندالماي وتىرعانىن ايتقان ەدى.
ءوز بايانداماسىندا دەنساۋلىق ساقتاۋ ءمينيسترى قازاقستاندا ءولىم ازايعانىن، ءومىر ءسۇرۋ ۇزاقتىعى ارتىپ، سالانى قارجىلاندىرۋ كولەمى ارتقانىن ايتۋدا.
سونداي-اق، اقمارال ءالنازاروۆا مەديتسينالىق ساقتاندىرۋعا قاتىستى جاڭا زاڭنامادا قانداي وزگەرىستەر بولاتىنىن ايتىپ بەردى.