ءبىر ادام يەلىك ەتە الاتىن جەردىڭ شەكتى كولەمى قانداي بولماق
استانا. KAZINFORM - پرەمەر-مينيستر ولجاس بەكتەنوۆ سەنات دەپۋتاتتارىنىڭ ءبىر ادام يەلىك ەتە الاتىن جەر كولەمىنىڭ شەكتى مولشەرىنە قاتىستى ساۋالدارىنا جاۋاپ بەردى.
«2022 -جىلدىڭ 8-اقپانىندا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى جەر ۋچاسكەلەرىنىڭ شەكتى مولشەرىن انىقتاۋ ءۇشىن ساراپشىلار مەن عىلىمي ينستيتۋتتاردىڭ قاتىسۋىمەن جۇمىس توبىن قۇرۋدى تاپسىرعان بولاتىن. جۇمىس توبىنا مەملەكەتتىك جانە جەرگىلىكتى اتقارۋشى ورگانداردىڭ، «اتامەكەن» ۇ ك پ-نىڭ وكىلدەرى، زەرتتەۋ ينستيتۋتتارىنىڭ، عىلىمي-وندىرىستىك ورتالىقتاردىڭ وكىلدەرى، شارۋا قوجالىقتارىنىڭ باسشىلارى، قوعام قايراتكەرلەرى كىردى. جۇمىس توبى جۇمىسىنىڭ قورىتىندىسىندا، سونىمەن قاتار قازاق اگرارلىق-ونەركاسىپتىك كەشەنىنىڭ ەكونوميكاسى جانە اۋىلدىق اۋماقتاردى دامىتۋ عىلىمي- زەرتتەۋ ينستيتۋتىنىڭ ەسەپتەۋلەرى نەگىزىندە اۋىل شارۋاشىلىعى جەرلەرىنىڭ شەكتى مولشەرى بويىنشا ۇسىنىس ازىرلەندى. وندا جەر كولەمى جەرگىلىكتى جاعدايعا جانە ەرەكشەلىكتەرگە بايلانىستى زاڭدى تۇلعالارعا 51 مىڭ گەكتاردان، ال شارۋا قوجالىقتارىنا 35 مىڭ گەكتاردان اسپايدى»، - دەپ اتاپ وتەدى ۇكىمەت باسشىسى جاۋابىندا.
دەگەنمەن پرەمەر-ءمينيستردىڭ ايتۋىنشا، اۋىل شارۋاشىلىعى تاۋارلارىن وندىرۋشىلەردەن اۋىل شارۋاشىلىعى ماقساتىنداعى جەردىڭ مۇنداي مولشەرىن قايتا قاراۋعا قاتىستى ۇسىنىستار ءتۇسىپ جاتىر.
«اۋىل شارۋاشىلىعى ماقساتىنداعى جەرلەردى قورعاۋ جانە پايدالانۋ ماسەلەسى وبلىس اكىمدىكتەرىنىڭ قاتىسۋىمەن ۇكىمەتتىك جۇمىس كوميسسياسىنىڭ وتىرىسىندا تۇراقتى تۇردە قارالادى. كوميسسيا ماقساتى - اۋىل شارۋاشىلىعى جەرلەرىن ءتيىمدى پايدالانۋ ماسەلەلەرىن قاراستىرۋ، سونداي-اق جەردى اشىق ءارى ءادىل ءبولۋ ارقىلى ودان ارى اۋىل شارۋاشىلىعى اينالىمىنا ەنگىزۋ. اۋىل شارۋاشىلىعى جەرلەرىنىڭ شەكتى مولشەرىن قايتا قاراۋ ماسەلەسى اتالعان كوميسسيا اياسىندا قاراستىرىلادى»، - دەدى ولجاس بەكتەنوۆ.
اۆتور
مارلان جيەمباي
