ءبىلىم بەرۋ ينفراقۇرىلىمىن جەتىلدىرۋگە دايىن ينۆەستورلاردى ىزدەيمىز- توقايەۆ
استانا. KAZINFORM - قازاقستان تەحنيكالىق جانە كاسىپتىك ءبىلىم بەرۋ ساپاسىن ارتتىرۋعا دايىن ينۆەستورلاردى ىزدەيدى.
بۇل تۋرالى ق ر پرەزيدەنتى جانىنداعى شەتەلدىك ينۆەستورلار كەڭەسىنىڭ 36- پلەنارلىق وتىرىسىندا مەملەكەت باسشىسى قاسىم-جومارت توقايەۆ ايتتى.
«وزدەرىڭىز دە بىلەتىندەي، قازاقستان قارا جانە ءتۇستى مەتالداردى ءوندىرۋ مەن ەكسپورتتاۋدا الەمدىك كوشباسشىلاردىڭ ءبىرى سانالادى. سونىمەن قاتار، ەل ءالى دە قازاقستاندا، جەرگىلىكتى جەردە ءوندىرىلۋى مۇمكىن قىمبات تاۋارلار مەن جيىنتىقتاۋىشتاردىڭ يمپورتىنا ايتارلىقتاي دارەجەدە تاۋەلدى. تاياۋدا قابىلدانعان ينفراقۇرىلىمدى دامىتۋدىڭ 2029 -جىلعا دەيىنگى ۇلتتىق جوسپارى جەرگىلىكتى وندىرۋشىلەر ءۇشىن كەڭ مۇمكىندىكتەر اشادى. قۇنى 86 ميلليارد دوللاردان استامعا باعالاناتىن 200 گە جۋىق اۋقىمدى ينفراقۇرىلىمدىق جوبا جۇزەگە اسىرىلادى»، - دەدى مەملەكەت باسشىسى.
قاسىم-جومارت توقايەۆ ۇكىمەت جەتكىزۋ كەلىسىمشارتتارى نەگىزىندە جەرگىلىكتەندىرۋگە ارنالعان ونىمدەردىڭ ءتىزىمىن جاسايتىندىعىن ايتتى.
«ونەركاسىپتىك ءوسىم ءۇشىن جوعارى بىلىكتى جۇمىس كۇشى قاجەت. سوندىقتان دا مەن 2025 -جىلدى جۇمىسشى ماماندىقتار جىلى دەپ جاريالادىم. ءبىز قازاقستاندا تەحنيكالىق جانە كاسىپتىك ءبىلىم بەرۋ ساپاسىن ارتتىرۋعا جانە ءبىلىم بەرۋ ينفراقۇرىلىمىن جەتىلدىرۋگە دايىن ينۆەستورلاردى ىزدەيمىز»، - دەدى پرەزيدەنت.
