ءبىلىم بەرۋ جانە دەنساۋلىق ساقتاۋ ۇيىمدارىندا تاماقتانۋدىڭ ستاندارتتارى وزگەرتىلدى

استانا. KAZINFORM - دەنساۋلىق ساقتاۋ ءمينيسترى 2025 -جىلعى 4-ناۋرىزداعى بۇيرىعىمەن دەنساۋلىق ساقتاۋ جانە ءبىلىم بەرۋ ۇيىمدارىندا تاماقتانۋ ستاندارتتارىنىڭ جاڭا ەرەجەسىن بەكىتتى.

ستاندارت دەنساۋلىق ساقتاۋ جانە ءبىلىم بەرۋ ۇيىمدارىندا تاماقتانۋدى ۇيىمداستىرۋدىڭ جالپى تالاپتارىن بەلگىلەيدى.

دەنساۋلىق ساقتاۋ ۇيىمدارىندا تاماقتانۋ قالاي ۇيىمداستىرىلۋى كەرەك.

ءاربىر دەنساۋلىق ساقتاۋ ۇيىمىندا نەگىزگى، تۇراقتى قولدانىلاتىن ديەتا بەلگىلەنەدى جانە قاجەت بولعان جاعدايدا باسقا ديەتا قولدانىلادى. سونىمەن قاتار، ارنايى كورسەتكىشتەرگە بايلانىستى ديەتاعا بەلگىلى ءبىر تۇزەتۋلەر ەنگىزىلۋى مۇمكىن. ديەتاداعى قوسىمشا وزگەرىستەر نەمەسە شەكتەۋلەر بەلگىلى ءبىر ەمدىك قاسيەتتەرى بار ونىمدەردى (سۇزبە، باۋىر، ءسۇت، قاربىز، الما، سارىمساق) ەنگىزۋ نەمەسە شەكتەۋ، سونداي-اق بەلگىلى ءبىر تاعامدىق ءونىمنىڭ (اقۋىز، ماي، كومىرسۋ، تۇز، دارۋمەن) مولشەرىن كوبەيتۋ نەمەسە ازايتۋ ارقىلى جۇزەگە اسىرىلادى.

ناۋقاس دەنساۋلىق ساقتاۋ ۇيىمىنا تۇسكەن كەزدە ەمدىك تاماقتانۋ كەزەكشى دارىگەردىڭ تاعايىنداۋىمەن بەلگىلەنەدى. تاعايىندالعان ديەتا اۋرۋ تاريحىنا ەنگىزىلەدى جانە بارلىق تۇسكەن ناۋقاسقا ارنالعان جيىنتىق تاپسىرىسقا جازىلىپ، بەلگىلەنگەن ۋاقىتتا اسحاناعا جىبەرىلەدى.

دەنساۋلىق ساقتاۋ ۇيىمدارىنىڭ اسحاناسىندا قاتاڭ ساقتالۋى ءتيىس:
- قوعامدىق تاماقتانۋ جانە دەنساۋلىق ساقتاۋ وبەكتىلەرىنە ارنالعان قولدانىستاعى سانيتارلىق ەرەجەلەردە كوزدەلگەن اسحانانى جابدىقتاۋ، سانيتاريالىق جاعدايدى ساقتاۋ جانە تاعام دايىنداۋ تەحنولوگياسى بويىنشا تالاپتار؛
- تاماق ونىمدەرىن ساقتاۋ شارتتارى مەن مەرزىمدەرى بويىنشا تالاپتار؛
- اس بلوگى، تاماق تاراتۋ بولىمدەرى مەن بۋفەت قىزمەتكەرلەرىنىڭ مىندەتتى پروفيلاكتيكالىق جانە مەديتسينالىق تەكسەرۋلەردەن ءوتۋ تالاپتارى.
ءبىلىم بەرۋ ۇيىمدارىندا تاماقتانۋ قالاي ۇيىمداستىرلۋى كەرەك
- ءبىلىم بەرۋ ۇيىمىنىڭ بەيىنىنە، ءبىلىم الۋشىلاردىڭ بولۋ ۋاقىتىنا، جاس ەرەكشەلىكتەرىنە سايكەس تاماقتانۋ ءتاسىلىن، فورماسىن، مودەلىن، رەجيمىن (جيىلىگىن) جانە ۇيىمداستىرۋ كەستەسىن ايقىنداۋ؛
- تاماق تانۋدى ۇيىمداستىرۋعا قاتىساتىن بارلىق تاراپتىڭ، سونىڭ ىشىندە ءبىلىم بەرۋ سالاسىنداعى باسقارۋ ورگاندارىنىڭ، ءبىلىم بەرۋ ۇيىمدارىنىڭ اكىمشىلىگىنىڭ، تاماقتانۋ قىزمەتىن جەتكىزۋشىلەردىڭ ءوزارا ارەكەتتەستىگىن قامتاماسىز ەتۋ؛
- ءبىلىم بەرۋ ۇيىمدارىندا تاماقتانۋدى ۇيىمداستىرۋعا جاۋاپتى تۇلعالاردى انىقتاۋ؛
- ءتورت اپتالىق ماۋسىمدىق پەرسپەكتيۆالىق ءمازىردى، كۇندەلىكتى تاعام ۇلەسىن ەسەپتەيتىن ءمازىر جانە كۇندەلىكتى ءمازىردى ازىرلەۋ؛
- بيۋدجەت قاراجاتى، جەكە نەمەسە باسقا جولمەن تارتىلعان قاراجات ەسەبىنەن ىستىق تاماقپەن قامتاماسىز ەتىلەتىن ءبىلىم الۋشىلاردىڭ ونىڭ ىشىندە ارنايى ديەتالىق قاجەتتىلىگى بار بالالاردىڭ ەسەبىن جۇرگىزۋ؛
- اسحانا جابدىعى مەن قۇرالدارىن جۇمىس جاعدايىندا ۇستاۋ، ولاردى تۇراقتى جاڭارتۋ، جەتكىلىكتى مولشەردە ىدىس-اياق، جيھاز، ۇزدىكسىز ەنەرگيا مەن سۋمەن جابدىقتاۋ، سونىمەن قاتار سۋ بۇرۋ، جەلدەتۋ جانە اۋا باپتاۋ جۇيەلەرىنىڭ تۇراقتى جۇمىسىن قامتاماسىز ەتۋ؛
- تاماق تانۋدى ۇيىمداستىرۋ بويىنشا ەسەپكە الۋ جانە ەسەپ قۇجاتتاماسىن جۇرگىزۋ؛
- ازىق- تۇلىك ونىمدەرى مەن دايىن تاعامداردىڭ ساپاسى مەن قاۋىپسىزدىگىنە، تاماقتانۋدى ۇيىمداستىرۋعا، قازاقستان رەسپۋبليكاسىنىڭ تاماق ونىمدەرىنىڭ قاۋىپسىزدىگى جانە سانيتارلىق-ەپيدەميولوگيالىق سالاسىنداعى زاڭناماسىن ساقتاۋعا وندىرىستىك باقىلاۋدى جۇزەگە اسىرۋ.

دەنساۋلىق ساقتاۋ جانە ءبىلىم بەرۋ ۇيىمدارىندا تاماقتانۋ ستاندارتتارىمەن تولىعىراق سىلتەمەگە ءوتىپ تانىسۋعا بولادى.

ايتا كەتسەك، جىل باسىندا ماماندار وقۋشىلاردىڭ دۇرىس تاماقتانۋىنىڭ پەرسپەكتيۆالىق مازىرىن ازىرلەدى.

اۆتور

داۋلەت ىزتىلەۋ