ءبارىنىڭ اياعىنا وق تيگەن: اقتوبەدەگى توبەلەستەن سوڭ 8 جىگىت ەم الىپ جاتىر

اقتوبە. KAZINFORM - اقتوبە وبلىستىق كوپسالالى اۋرۋحاناسىندا قازىر 8 ادام ەم الىپ جاتىر. ولار 18-22 جاستاعى جىگىتتەر. ءبارىنىڭ اياعىندا بىتىرا جاراقاتى بار.

اقتوبە وبلىستىق پوليتسيا دەپارتامەنتى وسى توبەلەسكە قاتىسقان 4 كۇدىكتىنى ۇستاپ، قازىر قىلمىستىق كودەكستىڭ «ادام ءولتىرۋ»، «بۇزاقىلىق» باپتارى بويىنشا تەرگەۋ جۇرگىزىپ جاتىر.

ال 8 جىگىت وبلىستىق كوپسالالى اۋرۋحاناسىندا. ولاردىڭ ءبارىنىڭ اياعىنا بىتىرا تيگەن.

- تۇندە ساعات شامامەن 2:00-دە بەلگىسىز بىرەۋ جاس جىگىتتى اكەلدى. كلينيكالىق ءولىم جاعدايىندا جەتكىزىلدى. ونىڭ ءومىرىن ساقتاپ قالۋ ءۇشىن بار جاعداي جاسالعانىمەن، كوپتەگەن پىشاق جاراقاتىنان، وق جاراقاتىنان كوز جۇمدى. سودان كەيىن جاس جىگىتتەردى اكەلە باستادى. بارلىعى 8 جىگىت جەتكىزىلدى. ولار 2002-2006 -جىلدار ارالىعىنداعى جىگىتتەر. ءبارىنىڭ اياعىندا بىتىرا جاراقاتى بولدى. ولارعا ەم-دوم كورسەتىلىپ جاتىر. ءبارىنىڭ جاعدايى تۇراقتى. جانساقتاۋ بولىمىندە جاتقان ەشكىم جوق. ولاردىڭ ستۋدەنت نەمەسە وقۋشى ەكەنى بەلگىسىز. كىمدەر ەكەنىن ناقتى ايتا المايمىز. بارىنە كۇزەت قويىلعان. ولاردى جەكە كولىكپەن، كەيبىرىن پوليتسيا اكەلدى، - دەدى اقتوبە وبلىستىق كوپسالالى اۋرۋحاناسى تراۆماتولوگيا ءبولىمىنىڭ تراۆماتولوگ دارىگەرى جاسلان ۋرۋمبايەۆ.

ايتا كەتەيىك، توبەلەس كەزىندە پىشاق جانە وق جاراقاتىنان كوز جۇمعان جىگىتتىڭ جاسى 18-دە بولعان. ازىرگە توبەلەستىڭ سەبەبى ايتىلمادى.

اۆتور
التىناي ساعىندىقوۆا