ءبارى ويدان قۇراستىرىلعان: شەرزات ىسىندەگى باستى ايىپتالۋشى وسىعان دەيىنگى سوزىنەن باس تارتتى

تالدىقورعان. KAZINFORM - جەتىسۋ وبلىسىنىڭ مامانداندىرىلعان اۋدانارالىق سوتىندا شەرزات پولاتتىڭ ولىمىنە قاتىستى قىلمىستىق ءىس قارالىپ جاتىر. بۇگىن باستى سوتتالۋشى ابزال شىناسىل ءوز جاۋابىن بەرىپ، قىلمىس جاسالعاننان كەيىنگى جاعداي تۋرالى ايتىپ بەردى.

ايىپتالۋشىنىڭ ايتۋىنشا، قونايەۆ قالاسىنا ەتاپپەن جونەلتۋ الدىندا ول بىرنەشە اداممەن ءوزارا كەلىسكەن.

- قونايەۆقا ەتاپپەن كەتەر كەزدە راۆيل ساكيەۆ، بەلعوجايەۆ جانە ازامات توقتاۋبايەۆ ۇشەۋمىز الدىن الا كەلىسىمگە كەلدىك. ساكيەۆ «مۇنى ءبىر ادام موينىنا السىن، ايتپەسە بارىمىزگە قيىن بولادى» دەدى. سول ساتتە مەن پىشاق قولدانعان ادام رەتىندە قىلمىستى جاسىرىپ جۇرگەندەي بولماۋ ءۇشىن ىشتەي ويلانىپ، شەرزاتتىڭ ءولىمىن موينىما الدىم، - دەدى ابزال.

ونىڭ ايتۋىنشا، باستاپقى كەلىسىم بويىنشا، نۇرقاناتتىڭ جامباسىنان تابىلعان پىشاقتى شىڭعىس ءوز موينىنا الادى دەپ كەلىسكەن.

- تەرگەۋ بارىسىندا ءبىز وسى كەلىسىم بويىنشا جاۋاپ بەردىك، - دەدى سوتتالۋشى.

سوتتالۋشىنىڭ سوزىنە سەنسەك، 2024 -جىلدىڭ 16-قازانىنان بەرى بەرگەن جاۋاپتارىنىڭ ءبارى ويدان قۇراستىرىلعان.

مۇنىڭ الدىندا ابزال شىناسىل نۇرقانات عايىپبايەۆتى ءۇش جەرىنەن پىشاقتاعانىن ايتقان بولاتىن.

ەسكە سالا كەتەيىك، شەرزات پولاتتىڭ ولىمىنە قاتىستى بۇگىنگى سوتتا تاعى ءبىر سوتتالۋشى ايىپتاۋ اكتىسىمەن كەلىسپەيتىنىن ايتقان.

تاعى ءبىر سوتتالۋشى نۇرقياس ءىلياسوۆ مىلتىقپەن ۇرۋ سەبەبىن تۇسىندىرسە، ازامات توقتاۋبايەۆ وتىرىك ايعاق بەرگەنىن راستادى.

كامەلەتكە تولماعان تاعى ءبىر ايىپتالۋشى دۋمان ىسقاق وزىنە تاعىلعان ايىپتى مويىندامادى.

ايتا كەتەيىك، شەرزات پولاتتىڭ ءولىمى بويىنشا العاشقى سوت وتىرىسىندا پروكۋرور وقيعانىڭ تولىق حرونولوگياسىن باياندادى.

بىلتىر 4 قازان كۇنى توبەلەستەن 16 جاستاعى جاس ءوسپىرىم قازا بولعانىن جازعان ەدىك.

2024 -جىلدىڭ 12-قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

2024 -جىلدىڭ جەلتوقسان ايىندا تالعار ماڭىندا شەرزاتتىڭ اعاسى نۇرقانات عايىپبايەۆتىڭ دەنەسى تابىلدى.