عاسىر جاساعان اجە كىتاپ وقىپ، ينەنى ءوزى ساباقتايدى
قاراعاندى وبلىسىنىڭ ەڭ قارت تۇرعىندارىنىڭ ءبىرى - تۇمار ىسقاقوۆا. جاسى 100 دەن اسقان اجەي نۇرا اۋدانىنىڭ كەرتىندى اۋىلىندا تۇرادى.
ۇزاق جىلدار اۋىل شارۋاشىلعى سالاسىندا ەڭبەك ەتكەن كەيۋانانىڭ قازىر دەنساۋلىعى تىڭ. ءالى كۇنگە ءىس تىگىپ، گازەت- جۋرنال وقيدى. تۇمار اپا شەت اۋدانىندا دۇنيەگە كەلگەن. تۇرمىس قۇرعاننان كەيىن نۇرا اۋدانى كەرتىندى اۋىلىنا كوشىپ كەلگەن. ايتۋىنشا، شارۋالاردىڭ اۋىر ەڭبەگىنە ەرتە جاستان ارالاسىپ، مال باعىپتى. تۇمار ىسقاقوۆا، كەرتىندى اۋىلىنىڭ تۇرعىنى:
- ول ۋاقىتتا كولحوز عوي، «كوللەكتيۆنوە حوزيايستۆو». سوندا «بۋحگالتەرياسىندا» ىستەدىم، جازعىتۇرىم ەگىن سالىپ، جەر ايدايدى وگىزبەنەن، سيىرمەنەن. جىرتىلعان جەردى ەسەپتەپ، سوعان ەڭبەك كۇنىن جازادى. وعان تولەيتىن اقشا دا جوق ول ۋاقىتتا. سوندا جەر ولشەدىم، مىناداي ەكى تارماقتى تاياعىم بار.
تۇمار اجە احمەتبەك اقساقال ەكەۋى ەكى ۇل تاربيەلەپ ءوسىردى. بۇگىندە كەيۋانا نەمەرەلەرى مەن شوبەرەلەرىن تاربيەلەپ وتىر. ءالى كۇنگە كىتاپ، گازەت- جۋرنال وقىپ، تەلەديدار كورەدى. ەلدە بولىپ جاتقان جاڭالىقتاردى قالت جىبەرمەيدى. اجەي سوعىس جىلدارى اۋىلداستارىمەن بىرگە مايدانعا سالەمدەمەلەر جيناپ، ساربازدارعا شۇلىق پەن جىلى زاتتار توقىعان. سول جاس كەزدە قالىپتاسقان ىسمەرلىگى ءالى كۇنگە ساقتالعان. ينەنى ءوزى ساباقتاپ، قاجەتتى دۇنيەنى تىگە بەرەدى.
ساعىنتاي ىسقاقوۆ، كەرتىندى اۋىلىنىڭ تۇرعىنى:
- انامىزدىڭ ەستۋ قابىلەتى، بارلىعى ورنىندا. نەمەرەلەرىنىڭ تۋعان كۇندەرىن، اتى- ءجونىن تۇگەل جاتقا ءبىلىپ وتىرادى. شاحمات وينايدى. سونىڭ بارلىعى ەرەكشە عوي وسىنداي جاسقا كەلىپ. قارياسى بار ءۇي قازىنالى. اۋىلدارى مەن الىس- جاقىننان ساپارلاپ كەلەتىن قوناقتار اجەيدىڭ شاڭىراعىنا ارنايى سوعىپ سالەم بەرەدى. «جاستار ۇلكەندەردىڭ ومىرلىك تاجىريبەسى مەن عيبراتتى اڭگىمەسىنەن ۇلگى الۋى كەرەك»، - دەيدى اۋىل تۇرعىنى ساۋلە اۋباكىروۆا.
ساۋلە اۋباكىروۆا، كەرتىندى اۋىلىنىڭ تۇرعىنى:
- شەشەممەن قۇرداس بولدى. بىرگە جۇردىك، بىرگە تۇردىق. قازىر دە 3-4 كۇن سايىن كەلىپ تۇرامىن. حال- جاعدايىن ءبىلىپ تۇرامىن. كەلمەسەم، ءوزى حابارلاسىپ تۇرادى. قۋانىپ قالادى: «كەلدىڭ بە، اۋىلدى ايتشى»، - دەپ.
قاراعاندى وبلىسىندا 60 جاستان اسقان 181 مىڭ ادام تۇرادى. ال عاسىر جاساعان قاريالار سانى - 25. قاجىرلى قايراتپەن، جالىندى جىگەرمەن، تۇنىق زەردەمەن وسىناۋ جاسقا جەتكەن تۇمار ىسقاقوۆانىڭ ءومىر جولى كوپكە ۇلگى.
اۆتورلارى: رۋسلان نۇرلان ۇلى، سايران اقامبايەۆ، زارينا زۇلپىحار.
