عاسىر جاساعان اجەنىڭ شوبەرەسىنە جاساعان جاقسىلىعى ەلدى تولقىتتى

جاستايىنان ەڭبەككە ارالاسىپ، بەينەتپەن وتكەن ءومىرى كوپكە ۇلگى بولعان كاميلا اجە ءالى كۇنگە دەيىن قولونەرمەن اينالىسادى.

«قوي، سيىر باقتىم، ساۋىنشى بولدىم، پىشەن شاپتىم. قولونەرمەن اينالىسامىن، ءىس تىگەمىن. حالىقارالىق قولونەرشىلەردىڭ لاۋرەاتى بولعان اداممىن. قازىر دە توقيمىن، بارىنەن جىلدام، بارىنەن ادەمى توقيمىن»، - دەيدى ول.

كاميلا اجە ءۇش رەت ۇلكەن قاجىلىققا بارعان. ءالى كۇنگە دەيىن بەس ۋاقىت نامازىن قازا قىلمايدى.

«ون جاسىمدا سوعىس باستالدى. ءتورت سىنىپتىق قانا ءبىلىمىم بار. ءۇش ولەڭ كىتابىم جانە ءبىر پروزالىق كىتابىم بار. ماعان حالىق جازۋشىسى دەگەن اتاق بەردى. ءتورت جاسىمنان باستاپ ومىرىمدە بولعان وقيعالاردىڭ ءبارىن بىلەمىن، ەشتەڭەنى ۇمىتقان جوقپىن. 1928 -جىلى اكەم باي بولعاندىقتان، مال-مۇلكىمىز تاركىلەندى. سول كەزدە نە بولعانىن، قانداي وقيعالار وتكەنىن تۇگەل بىلەمىن. ول كەزدە ءتورت جاستا ەدىم»، - دەيدى اجەي.

كاميلا اجە 82 جاسىندا قۇراندى نەبارى ەكى ايدا تولىق جاتتاپ العان.

«2012 -جىلى تۇركيادا «كورىكتى انا» دەگەن بايقاۋ ءوتتى. سول جەردە باس جۇلدەنى الدىم. تۇرىك اعايىندار قۇرمەت كورسەتىپ، كۋبوكتارىن تابىستادى. كەيىن ولار مەن تۋرالى «انالاردىڭ اناسى» دەگەن فيلم ءتۇسىرىپ، ونى تۇركيادا كورسەتىپ ءجۇر»، - دەيدى كاميلا قاسىموۆا.

سونىمەن قاتار ول الەم جازۋشىلار وداعىنىڭ مۇشەسى بولعان.

«قازاقستانداعى 28 اقىننىڭ ولەڭدەرى تاڭدالىپ، «الەم جازۋشىلار انتولوگياسى» دەگەن كىتاپقا ەنگىزىلدى. سول 28 ادامنىڭ ءبىرى مەن بولدىم. ءۇش ادامعا مەدال بەرىلدى، سونىڭ ءبىرى – مەن»، - دەيدى اجە.

كاميلا قاسىموۆا ەڭبەك جولىنىڭ باسىم بولىگىن تراكتور بريگاداسىندا ەسەپشى بولىپ وتكىزگەن. ول قازاقستانعا رەسەيدەن كوشىپ كەلگەن. 1970 -جىلى ەسىكتەگى تىگىن فابريكاسىنا تىگىنشى بولىپ ورنالاسقان. كەيىن باسشىلىق ونىڭ بىلىكتىلىگىن باعالاپ، ساپا ءبولىمىنىڭ باسشىسى ەتىپ تاعايىنداعان. سول جەردەن زەينەتكە شىققان.

كاميلا اجەنىڭ ءتورت بالاسى، التى نەمەرەسى، 16 شوبەرەسى جانە 11 شوپشەگى بار.

«ءتورت بالام بار، ەڭ ۇلكەنى - قىز. بيىل 76 جاسقا تولدى. التى نەمەرە، 16 شوبەرە بار. شوبەرەلەرىمنىڭ ۇلكەنى 37 جاستا. 11 شوپشەگىم بار، ەڭ ۇلكەنى بەسىنشى سىنىپتا وقيدى. ءبىر عاسىرلىق ءومىرىم بار، ءبىراق ءبىر دە ءبىر وكىنىشىم جوق. اللاعا سانسىز شۇكىر. اللا تاعى دا ءومىر بەرسە، ءدال وسىلاي ءومىر سۇرەر ەدىم»، - دەيدى ول.

اجە 31 جاسىندا جەسىر قالعان. سول كەزدە ءتورت بالاسىنىڭ كەنجەسى نەبارى ءبىر جاستا بولعان. بۇگىندە ول كەيىنگى ۇرپاققا اقىل-كەڭەسىن ايتىپ وتىرادى.

«بىرەۋ بىردەڭە ايتتى ەكەن دەپ اشۋلانباۋ كەرەك. تاتۋ، كەشىرىمشىل، ادال بولىڭدار. بىرەۋدىڭ زاتىن رۇقساتسىز الماڭدار، الا ءجىبىن اتتاماڭدار. ەشقاشان وتىرىك ايتپاڭدار. تاعى ءبىر ايتار اقىلىم - بالاعا دۇرىس قاراڭدار، ەڭبەككە باۋلىڭدار»، - دەيدى كاميلا اجە.

كەيۋانا ومىرىندە قيىندىقتار از بولماعانىن ايتادى. الايدا ول سول ساتتەردى ەسىنە تۇسىرگىسى كەلمەيدى.

كاميلا اجەنىڭ كوزى ءالى دە جاقسى كورەدى، كوزىلدىرىك تاقپايدى. نەمەرە-شوبەرەلەرىنىڭ جانىندا بولىپ، ولارعا قولعابىسىن تيگىزىپ كەلەدى.

اجەنىڭ دانارا ەسىمدى شوبەرەسى ونىڭ وزىنە كورسەتكەن قامقورلىعىن ەرەكشە ىقىلاسپەن ەسكە الادى.

«مەنىڭ ەكى باۋىرىم ەگىز. ءوزىم ءجيى اۋىراتىنمىن. اكە-شەشەم سولاردىڭ قامىمەن جۇرەتىن. ال مەنى اجەم ءوسىردى. تۇرمىسقا شىققان كەزدە قينالدىم. ءتىپتى ومىراۋ ءسۇتىم تارتىلىپ، ءبىر جارىم ايلىق بالام ءسۇتسىز قالدى. ءبىر كۇنى اجەم تەلەفون سوعىپ: «قىزىم، ءتۇس كوردىم. ءسۇتىڭ تارتىلىپ قالدى ما؟ ۇيگە قايت، مەن سەنى قانداي بولساڭ دا قابىلدايمىن»، - دەدى. بالامنىڭ اتى – ءابىلمانسۇر»، - دەيدى دانارا احمەدوۆا.

ول كەزدە كاميلا اجە 93 جاستا بولعان. ءابىلمانسۇردى باۋىرىنا باسىپ، بىرگە تاربيەلەگەن.

جۋىردا كاميلا اجە مەن ونىڭ شوپشەگى ءابىلمانسۇردىڭ بىرگە تۇسكەن بەينەجازباسى الەۋمەتتىك جەلىدە تاراپ، كوپشىلىكتىڭ كوڭىلىن تولقىتتى.