عارىش اسكەري باسەكەنىڭ تىكەلەي الاڭىنا اينالدى – ۇلى بريتانيا ا ا ك باسشىسى

سارسەنبى كۇنى ۇلىبريتانيا قورعانىس مينيسترلىگى ەلدىڭ اسكەري-اۋە كۇشتەرى قۇرامىندا عارىش وپەراتسيالارىنا جاۋاپ بەرەتىن 3-ەسكادريليا قۇرىلاتىنىن حابارلادى.

اسكەري قىزمەتشىلەر بريتاندىق اسكەري سپۋتنيكتەردىڭ قالىپتى جۇمىسىنا كەدەرگى كەلتىرەتىن ارەكەتتەرگە توسقاۋىل قويادى. نەگىزگى نازار كەمەلەردىڭ ناۆيگاتسياسىن، موبيلدى بايلانىستى جانە زىمىران ۇشىرۋ تۋرالى ەسكەرتۋ جۇيەلەرىن قامتاماسىز ەتەتىن سپۋتنيكتەردى قورعاۋعا باعىتتالادى.

وسى ماقساتتا اسكەري قىزمەتشىلەر زاماناۋي راديوەلەكتروندىق كۇرەس قۇرالدارىمەن جابدىقتالادى. بۇل قۇرالدار نىساندى جويماي-اق، سيگنالداردى باسىپ، قارسى تاراپتىڭ ەلەكتروندىق جۇيەلەرىنىڭ جۇمىسىنا كەدەرگى كەلتىرەدى.

ۇلى بريتانيا قورعانىس مينيسترلىگىنىڭ مالىمەتىنشە، جاڭا ەسكادريليا قورعانىس جانە شابۋىلداۋ سيپاتىنداعى عارىش وپەراتسيالارىنا قاتىسادى. الايدا لوندون شابۋىلعا قاتىستى ناقتى مىندەتتەرىن ازىرگە جاريالاعان جوق.

جاڭا قۇرىلىمنىڭ پايدا بولۋىن سپۋتنيكتىك تەحنولوگيالاردىڭ ەل ومىرىندەگى ماڭىزىنىڭ ارتۋىمەن بايلانىستىرادى. بۇگىندە ولار ءموبيلدى بايلانىس، ناۆيگاتسيا جانە اۋا رايىن بولجاۋ سياقتى ماڭىزدى سالالاردىڭ تۇراقتى جۇمىسىن قامتاماسىز ەتەدى. توتەنشە جاعداي كەزىندە وربيتالىق جۇيەلەر پوليتسياعا، ءورت ءسوندىرۋ جانە جەدەل جاردەم قىزمەتتەرىنە دە قولداۋ كورسەتەدى.

- ۇلىبريتانيا جاڭا عارىشتىق باسەكەگە ىلەسە ءبىلۋى كەرەك. XIX عاسىردا تەڭىزدەگى ۇستەمدىك ەلدىڭ قورعانىسىن قامتاماسىز ەتۋدىڭ نەگىزگى تەتىگى بولدى. سوندىقتان ۇلى بريتانيا تاريحتاعى ەڭ قۋاتتى اسكەري-تەڭىز كۇشتەرىنىڭ ءبىرىن قالىپتاستىردى. XX عاسىردا باستى ماسەلە اۋە كەڭىستىگىن باقىلاۋعا اۋىستى. سول سەبەپتى ەل وزىن قورعاۋ ءۇشىن الەمدەگى جەتەكشى اسكەري-اۋە كۇشتەرىنىڭ ءبىرىن قۇردى. ال بۇل عاسىردىڭ تاعدىرى عارىش كەڭىستىگىن باقىلاۋعا بايلانىستى بولادى، - دەدى ۇلى بريتانيا قورعانىس ءمينيسترى ۋەس ستريتينگ.

ونىڭ ايتۋىنشا، سپۋتنيكتەردىڭ ماڭىزى ارتقان سايىن، ولارعا تونەتىن قاۋىپ تە كۇشەيىپ كەلەدى. مۇنداي قاتەردىڭ اۋقىمى كەڭەيىپ، عارىشتاعى باسەكەلەستىك جەردەگى گەوساياسي تەكەتىرەستى ايقىن كورسەتىپ وتىر.

ۇلى بريتانيا اسكەري-اۋە كۇشتەرى شتابىنىڭ باسشىسى حارۆ سميت عارىشتى اسكەري باسەكەنىڭ دەربەس باعىتى دەپ اتادى.

- عارىش ەندى اسكەري وپەراتسيالاردى قولدايتىن قوسالقى قۇرال ەمەس. بۇل - اسكەري باسىمدىق ءۇشىن تىكەلەي باسەكە جۇرەتىن جاڭا باعىت، - دەدى ول.

جاڭا ەسكادريليا ۇلى بريتانيا اسكەري-اۋە كۇشتەرىنىڭ عارىش باعىتىنا جاۋاپ بەرەتىن ءۇشىنشى بولىمشەسى بولادى. بۇعان دەيىن قۇرىلعان ەكى ەسكادريليا قاۋىپ-قاتەردى باقىلاپ، ەسكەرتۋگە جاۋاپ بەرسە، جاڭا بولىمشە مۇنداي قاتەرلەرگە تىكەلەي قارسى ارەكەت ەتەدى.

بريتان بيلىگى عارىش كەڭىستىگىن بەيبىت ءارى تۇراقتى پايدالانۋدى قولدايتىنىن مالىمدەدى. لوندون وربيتاداعى سپۋتنيكتەردى جويىپ، عارىش نىساندارىنىڭ قاۋىپسىزدىگىنە قاتەر توندىرەتىن سپۋتنيككە قارسى زىمىرانداردىڭ سىناقتارىن وتكىزبەيتىنىن رەسمي تۇردە جاريالادى.

ۇلى بريتانيا ب ۇ ۇ- نىڭ عارىشتى بەيبىت ماقساتتا پايدالانۋ جونىندەگى كوميتەتى اياسىنداعى جۇمىسىن جالعاستىرىپ، عارىش كەڭىستىگىندە جاۋاپتى ارەكەت ەتۋ نورمالارى مەن قاعيداتتارىنىڭ ساقتالۋىن قولدايدى.

سونىمەن قاتار لوندون بۇل باعىتقا بولىنەتىن قارجىنى ارتتىرىپ وتىر. ۇكىمەت 2030-جىلعا دەيىن عارىشتىق بارلاۋ، باقىلاۋ، اقپارات جيناۋ جانە عارىش كەڭىستىگىن باقىلاۋ شارالارىنا 880 ميلليون فۋنت ستەرلينگ ءبولۋدى جوسپارلاپ وتىر.

بۇعان دەيىن قىتاي عارىشقا سپۋتنيكتەردىڭ جاڭا توبىن ۇشىرعانىن حابارلاعان ەدىك.