ءاربىر ۇيدە مەملەكەتتىك تۋ ءىلىنىپ تۇرۋى كەرەك - جانداربەك مالىبەك ۇلى
ۇلتتىق ساۋلەت ونەرىن دامىتىپ، كىرمە ارحيتەكتۋرانى ىعىستىرىپ شىعارۋ كەرەك. بۇل تۋرالى بەلگىلى ساۋلەتشى، مەملەكەتتىك ەلتاڭبانىڭ اۆتورى جانداربەك مالىبەك ۇلى ءمالىم ەتتى، دەپ حابارلايدى Kazinform.
«ەلىمىزدە مەملەكەتتىك رامىزدەردى ناسيحاتتاۋ دەڭگەيىن كوتەرۋ كەرەك. مەملەكەتتىك تۋ ءار ەلدى مەكەندەگى، قالالارداعى كوشەلەردە ءىلىنىپ تۇرۋى ءتيىس. اسىرەسە، رەسپۋبليكا كۇنىندە بارلىق جەردە وسى ماسەلەگە نازار اۋدارعان ءجون. ءار ۇيدە ەلىمىزدىڭ تۋى مەن ەلتاڭباسى بولعانىن قالايمىن. سوندىقتان ءتۇرلى جيىنداردا وسى تاقىرىپتى كوتەرۋگە تىرىسامىن»، - دەدى جانداربەك مالىبەك ۇلى Kazinform تىلشىسىنە بەرگەن سۇحباتىندا.
ايتۋىنشا، ەلتاڭبانىڭ ماعىناسىن، ياعني وندا بەينەلەنگەن قۇندىلىقتاردى ەل حالقى جاقسى ءبىلۋى كەرەك.
«ەلتاڭبا - ءبىزدىڭ يدەولوگيالىق كارتامىز. وندا تاريحي جولىمىز، سىيلاستىق مەكتەبىمىز، ۇلتتىق قۇندىلىقتارىمىز ەسكەرىلگەن. اتاپ ايتقاندا، وسى ماڭىزدى تاقىرىپتى بارلىق دەڭگەيدە جاستارىمىز اراسىندا ءتۇسىندىرۋ ماڭىزدى»، - دەدى قازاقستان ەلتاڭباسىنىڭ اۆتورى.
ساۋلەتشى بۇدان بولەك، ۇلتتىق ساۋلەت ونەرى باعىتىنا دا توقتالدى.
«قازىر بىزدە بايقالىپ وتىرعان ارحيتەكتۋرا ءبىزدىڭ ۇلتتىق ناقىشتى ەلەمەي كەلەدى. جات ارحيتەكتۋرانىڭ ءبىزدىڭ داستۇرگە قاتىسى جوق ەكەنىن بىلەمىز. بۇل تۇرعىدا ۇلتتىق ارحيتەكتۋرانى دامىتۋ كەرەك دەپ سانايمىن. عىلىمي زەرتتەۋ جاساۋ قاجەت. ۇلى دالا وركەنيەتىنىڭ مادەنيەتى دە، فيلوسوفياسى دا باي. سوندىقتان كىرمە ارحيتەكتۋرانى ىعىستىرىپ شىعارۋ كەرەك»، - دەدى جانداربەك مالىبەك ۇلى.
ەلتاڭبا - ەلدىكتىڭ، تاۋەلسىزدىكتىڭ، مەملەكەتتىلىكتىڭ ەرەكشە بەلگىسى. بۇعان دەيىن قازاقستاننىڭ مەملەكەتتىك ەلتاڭباسى مەن ونىڭ اۆتورلارى تۋرالى ماڭىزدى دەرەكتەردى جازعان ەدىك.
ايتا كەتەيىك، مەملەكەتتىك تۋدى پايدالانۋ ەرەجەلەرىنە وزگەرىس ەنگىزىلەتىنى حابارلانعان بولاتىن. بيىل قىركۇيەك ايىندا اشىق تالقىعا شىعارىلعان ۇكىمەت قاۋلىسىنا ساي، ەندى تۋدى بالكوندارعا ىلۋگە رۇقسات ەتىلەدى.
