ءاربىر بەسىنشى بالا ارتىق سالماقتان زارداپ شەگەدى - اقمارال ءالنازاروۆا

 استانا. KAZINFORM - قازاقستاندا بالالار اراسىنداعى سەمىزدىك %6 عا ارتقان. بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا ءمالىم ەتتى.

«بۇگىندە ءاربىر بەسىنشى بالا ارتىق سالماقتان زارداپ شەگەدى، بالالار اراسىنداعى سەمىزدىك سوڭعى مالىمەتتەر بويىنشا 6 پايىزعا جەتەدى. بۇل كورسەتكىش جىل ساناپ ءوسىپ كەلەدى، اسىرەسە ەر ادامدار اراسىندا. بالالار اراسىنداعى سەمىزدىك، ول وسكەن سايىن قانت ديابەتىنە، قان اينالىمى جۇيەسىنىڭ اۋرۋلارىنا الىپ كەلەدى»، - دەدى اقمارال ءالنازاروۆا ۆەدومستۆونىڭ كەڭەيتىلگەن القا وتىرىسىندا.

مينيستر مىسال رەتىندە تەمەكى شەگۋ مەن قانت قوسىلعان سۋسىنداردىڭ زيانىن كەلتىردى.

«تەمەكىگە قاتىستى نورمالاردى زاڭنامادا دۇرىس جازدىق جانە ول ورىندالىپ جاتىر. تەمەكى ونىمدەرىنە باعانى كوتەرەمىز. سول سياقتى قانت قوسىلعان سۋسىنداردى تۇتىنۋ پروبلەماسى دا بار جانە بۇل سالا باقىلاۋسىز. سەبەبى بۇل جالپى تۇتىنۋعا جاتادى، مۇنىڭ ءبارى دەنساۋلىققا كەرى اسەر ەتەدى. بۇل باعىتتا ءبىراز جۇمىس اتقارۋىمىز كەرەك. وكىنىشكە قاراي، وتكەن جىلى ءاربىر بەسىنشى ادام قان اينالىمى جۇيەسىنىڭ اۋرۋىنان قايتىس بولعان. ودان بولەك، قانت ديابەتىنە شالدىعۋ بىرنەشە ەسە وسۋدە. ونىڭ ارتى ەرتە ءولىم-ءجىتىم، مۇگەدەكتىك سالدارىنا الىپ كەلەدى. سوندىقتان قوعامدىق دەنساۋلىق ساقتاۋ ماسەلەسى اسا ماڭىزدى»، - دەيدى ول.

اقمارال ءالنازاروۆا