ءانشى ديماش قۇدايبەرگەننىڭ جانكۇيەرلەرى يسپانيادا باس قوستى
استانا. KAZINFORM - مادريدتە قازاقستاندىق ءانشى ديماش قۇدايبەرگەننىڭ جانكۇيەرلەرىنىڭ كەزدەسۋى ءوتتى. ءىس-شاراعا يسپانيانىڭ تۇكپىر-تۇكپىرىنەن، سونداي-اق گەرمانيا مەن شۆەيتساريادان دا جانكۇيەرلەر جينالدى.
بۇل دومبىرا كۇنىنە وراي يسپان مەن قازاق مادەنيەتىن بىرىكتىرەتىن ماڭىزدى ءىس-شارا بولدى، دەپ جازدى dimashnews.com.
مارتەبەلى قوناقتاردىڭ قاتارىندا قازاقستاننىڭ يسپانياداعى ەلشىلىگىنىڭ وكىلدەرى، ونىڭ ىشىندە ەلشى دانات مۇسايەۆ، ءبىرىنشى حاتشى قۋانىش ءابپاسوۆ، مادەنيەت جانە تۋريزم باسقارماسىنىڭ باسشىسى رايىمبەك توقتاۋبايەۆ بولدى. سونداي-اق، يسپاندىق جانكۇيەرلەرگە قازاق تىلىنەن ونلاين ساباق بەرىپ جۇرگەن پروفەسسور ساندۋ توقتاۋبايەۆا دا قاتىسۋشىلاردىڭ ىستىق ىقىلاسىنا بولەندى.
دومبىرا كۇنىن اتاپ ءوتۋ ءۇشىن قازاقستان ەلشىلىگى كونتسەرت ۇيىمداستىرىپ، وندا بالالار ءداستۇرلى اسپاپتا ءار ءتۇرلى تۋىندىلار ورىندادى. الينۇر مەن ءاليحان امانگەلدى مەن داۋلەت يسمايلوۆتار ونەرلەرىن پاش ەتىپ، قازاق مۋزىكاسىنىڭ رۋحىن جەتكىزىپ، كورەرمەندەردى ونەرلەرىمەن باۋراپ الدى.
يسپانياداعى قازاق دياسپوراسىنىڭ وكىلى گۇلنارا گۋلچا قوناقتارعا قازاقتىڭ ۇلتتىق تاعامدارىن اۋىز تيگىزىپ جانە ۇلتتىق كيىمدەرىمەن تانىستىردى.
شاراعا ديماشقا ارنالعان تۋىندىلارىن ۇسىنعان فان-ارت سۋرەتشىسى حوسە بۋسون؛ Baqytty Bala 2023 جەڭىمپازى ليۋسيا كاساني؛ جانە La Voz Kids 2023 فيناليستى جالەن الي سىندى ارنايى قوناقتار دا قاتىستى. جاس انشىلەر ءان ورىنداپ، ادەمى كەشتى جانداندىردى. ال، كەشتىڭ سوڭىندا ورىندالعان ءنومىر كورەرمەندەردى ەرەكشە قۋانىشقا بولەدى.
ديماش قۇدايبەرگەن جانكۇيەرلەرىنىڭ مادريدتەگى كەزدەسۋى تەك مۋزىكا مەرەكەسى عانا ەمەس، مادەنيەتتەر بىرلىگىنىڭ سيمۆولىنا اينالدى.
