مۇعالىمدى مورالعا جات قىلىعى ءۇشىن جۇمىستان بوساتۋعا بولا ما

كونستيتۋتسيالىق سوت تاربيە بەرۋ فۋنكتسيالارىن اتقاراتىن جۇمىسكەردىڭ وسى جۇمىستى جالعاستىرۋمەن سىيىسپايتىن مورالعا جات قىلىق جاساعانى ءۇشىن ەڭبەك شارتىن بۇزۋدى كوزدەيتىن ەڭبەك كودەكسىنىڭ 52-بابى 1-تارماعىنىڭ 14) تارماقشاسىن كونستيتۋتسياعا سايكەستىگى تۇرعىسىنان تەكسەرۋ تۋرالى ءوتىنىشتى قارادى.

ءوتىنىش بەرۋشى مەكتەپتىڭ پەداگوگيكالىق ادەپ جونىندەگى كەڭەسىنىڭ شەشىمى نەگىزىندە جۇمىستان بوساتىلعان. بۇل شەشىممەن كەلىسپەگەن ول كەلىسۋ كوميسسياسىنا جانە سوتتارعا جۇگىنگەن. ءىس بويىنشا قابىلدانعان سوت اكتىلەرى وزگەرىسسىز قالدىرىلعان.

ءوتىنىش بەرۋشىنىڭ پىكىرىنشە، مورالعا جات قىلىقتىڭ ناقتى قۇقىقتىق بەلگىلەرى مەن وبەكتيۆتى ولشەمشارتتارىنىڭ بولماۋى اتالعان نورمانى قولدانۋ كەزىندە كەڭىنەن پايىمداۋعا جول بەرەدى جانە ونىڭ ەڭبەك ەتۋ مەن سوت ارقىلى قورعالۋ قۇقىقتارىن بۇزادى.

كونستيتۋتسيالىق سوت زاڭنامادا ادامگەرشىلىك قاعيداتتارىنا قاتىستى نورماتيۆتىك باعدارلار، ونىڭ ىشىندە پەداگوگيكالىق ادەپكە قويىلاتىن ارنايى تالاپتار مەن ولاردى بۇزعانى ءۇشىن جاۋاپتىلىق كوزدەلگەنىن اتاپ ءوتتى.

- «مورالعا جات قىلىق» ۇعىمى ءوزىنىڭ تابيعاتى بويىنشا باعالاۋ سيپاتىنداعى ۇعىم سانالاادى. سوندىقتان ونىڭ مازمۇنىن ءىس-ارەكەتتەردىڭ تۇپكىلىكتى تىزبەسى ارقىلى تولىق اشىپ كورسەتۋ مۇمكىن ەمەس. مۇنداي قىلىقتى باعالاۋ ناقتى ءىستىڭ ءمان-جايلارىن، سونداي-اق الەۋمەتتىك، مادەني جانە كاسىبي ەرەكشەلىكتەردى ەسكەرۋدى تالاپ ەتەدى. كونستيتۋتسيالىق سوت اتالعان ۇعىمنىڭ ناقتى ءمان-جايلاردى ەسكەرە وتىرىپ قولدانۋعا مۇمكىندىك بەرەتىن جەتكىلىكتى نورماتيۆتىك ايقىندىققا يە دەگەن قورىتىندىعا كەلدى. سونىمەن قاتار سوت ءوتىنىش بەرۋشىنىڭ كەلىسۋ كوميسسياسىنا جانە سوتتارعا جۇگىنۋ ارقىلى ءوز قۇقىقتارىن قورعاۋدىڭ زاڭدا كوزدەلگەن تەتىكتەرىن پايدالانعانىن اتاپ ءوتتى،- دەلىنگەن حابارلامادا.

وسىدان بۇرىن كونستيتۋتسيالىق سوت جەر داۋلارىنا قاتىستى جوعارعى سوت قاۋلىسىن تەكسەرەتىنىن جازدىق.