مۇعالىمدەردى قاعازباستىلىقتان بوساتۋ جانە بالا تاربيەسى: پرەزيدەنت جولداۋى تۋرالى پىكىر

- ءبىلىم بەرۋ سالاسىنداعى قاعازباستىلىقتى ازايتىپ، مۇعالىمدەردى ارتىق جۇمىستان بوساتۋ - وزەكتى ماسەلەلەردىڭ ءبىرى. ويتكەنى ۇستازدىڭ باستى مىندەتى - قۇجات تولتىرۋ ەمەس، بالاعا ساپالى ءبىلىم بەرىپ، سانالى ءارى جاۋاپكەرشىلىگى جوعارى ۇرپاق تاربيەلەۋ. سونىمەن قاتار وقۋشى مەن مۇعالىم اراسىنداعى ءوزارا تۇسىنىستىك پەن سىيلاستىقتى نىعايتۋ ماڭىزدى. بۇل قاعيدالار «ادال ازامات» ءبىرتۇتاس تاربيە باعدارلاماسىنىڭ قۇندىلىقتارىمەن دە ۇندەسەدى، - دەدى ول.

قۋانار مەيماننىڭ ايتۋىنشا، ءبىلىم بەرۋ سالاسىن دامىتۋ ءۇشىن مۇعالىمدەردىڭ جاعدايىن جاقسارتۋمەن قاتار، مەكتەپتەردىڭ ماتەريالدىق-تەحنيكالىق بازاسىن نىعايتۋ جانە زاماناۋي ءبىلىم بەرۋ ورتاسىن قالىپتاستىرۋ قاجەت. سوڭعى جەتى جىلدا ءبىلىم سالاسىنا بولىنەتىن قارجى ءۇش ەسە ارتىپ، 6,4 تريلليون تەڭگەگە جەتتى. سوڭعى بەس جىلدا 1 ميلليوننان استام وقۋشىعا ارنالعان 1120 مەكتەپ سالىندى. سونىمەن قاتار 5 مىڭنان استام اۋىل مەكتەبىنىڭ ماتەريالدىق-تەحنيكالىق بازاسى جاڭارتىلىپ، ءبىلىم بەرۋ ۇيىمدارىندا 7 مىڭنان استام زاماناۋي ءپان كابينەتى جابدىقتالعان.

- پرەزيدەنتتىڭ كەلەسى جىلدى جالپىحالىقتىق اۋقىمدى قۇرىلىس جىلى دەپ جاريالاۋى ءبىلىم بەرۋ ينفراقۇرىلىمىن دامىتۋعا دا سەرپىن بەرەدى. بۇل وسكەلەڭ ۇرپاقتىڭ ساپالى ءبىلىم الىپ، جان- جاقتى دامۋىنا جاعداي جاساۋ باعىتىنداعى جۇمىستاردىڭ جالعاساتىنىن كورسەتەدى. جاڭا كونستيتۋتسيادا قازاقستاننىڭ زايىرلى مەملەكەت ەكەنى ايقىندالعان. سوندىقتان ءبىلىم بەرۋ جۇيەسىن جەتىلدىرىپ، بالالاردىڭ زاماناۋي تالاپتارعا ساي ءبىلىم الۋىنا مۇمكىندىك جاساۋ ماڭىزدى. وسكەلەڭ ۇرپاقتى ىزگىلىككە، جاۋاپكەرشىلىككە جانە جاسامپازدىققا تاربيەلەۋ - مەملەكەت، ۇستازدار مەن اتا-انالارعا ورتاق مىندەت. وسى باعىتتا كۇش بىرىكتىرسەك، بالالاردىڭ ۇيلەسىمدى دامۋىنا جول اشامىز، - دەپ سانايدى ءبىلىم سالاسىنىڭ مامانى.

بۇعان دەيىن بيۋدجەتتەن جالاقى الاتىن 370 مىڭنان استام قىزمەتكەردىڭ تابىسىن ارتتىرۋعا جاعداي جاسالاتىنىن جازعان ەدىك.

ال ەلدە پەداگوگ مارتەبەسى قالاي قورعالىپ جاتقانىن مىنا شولۋ ماقالادان وقىڭىز.