مۇعالىمدەرگە ءتۇرلى ءىس-شارالاردان ۆيدەو تۇسىرتكىزۋدى دوعارۋ كەرەك - دەپۋتات
استانا. KAZINFORM - مۇعالىمدەرگە كەدەرگى كەلتىرەتىن باسى ارتىق جۇمىستاردى دوعارۋعا قاتىستى زاڭنامالىق شەشىم بولادى. بۇل تۋرالى قۇرىلتاي دەپۋتاتى اسحات ايماعامبەتوۆ ءمالىم ەتتى.
- ماسەلەن، مۇعالىمدەرگە مەكتەپتە وتەتىن ءتۇرلى ءىس-شارالاردى نەمەسە ساباقتى ۆيدەوعا ءتۇسىرىپ، reels-تەر جاريالاۋعا ماجبۇرلەيتىن كەزدەر بولادى. بۇعان دا كوپ ۋاقىت كەتەدى. سوندىقتان وسى تەكتەس قىزمەتىنەن تىس جۇمىستاردى جۇكتەۋ دۇرىس ەمەس. بۇعان قوسا ەسەپتىلىك ماسەلەسى بار. قازىر ءتۇرلى اقپاراتتىق جۇيەلەر پايدا بولىپ جاتىر. بۇل رەتتە سىنىپ جەتەكشىلەرىنە، مۇعالىمدەرگە، مەكتەپ ديرەكتورلارىنا، پسيحولوگتەرگە كوپتەگەن اقپاراتتىق جۇيەدەگى ەسەپتىلىكتى تولتىرتقىزۋ پروبلەماسى بايقالىپ وتىر، - دەدى اسحات ايماعامبەتوۆ قۇرىلتايدا مەملەكەت باسشىسىنىڭ جولداۋىنان كەيىن.
وسى ورايدا دەپۋتات ءقازىر پرەزيدەنت مۇعالىمدەردى ارتىق جۇكتەمەدەن بوساتۋ ماسەلەسىنە ەرەكشە ءمان بەرىپ وتىرعانىن ايتتى.
- كەيىنگى جەتى جىلدا مەملەكەت باسشىسى مۇعالىمدەرگە قاتىستى اۋقىمدى قولداۋ جاساپ كەلەدى. بۇگىنگى جولداۋدا بۇل تاقىرىپ تاعى دا قوزعالدى. قازىر ءبىز دايارلاعان زاڭ جوباسى اياسىندا پرەزيدەنت جۇكتەگەن مىندەتتەر جۇزەگە اسىرىلادى دەپ ويلايمىن، - دەدى اسحات ايماعامبەتوۆ.
ايتا كەتەيىك، قازاقستان حالقىنا جولداۋىن جاريالاۋ كەزىندە پرەزيدەنت قاسىم-جومارت توقايەۆ ۇستازدىڭ وقۋشىلارعا ءبىلىم بەرۋىنە كەدەرگى كەلتىرەتىن باسى ارتىق جۇمىستاردى دوعارۋ كەرەك ەكەنىن تاپسىردى.
