ءالىمحان سىزدىقوۆ پاريج وليمپياداسىنىڭ شيرەك فينالىنا شىقتى
پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارىندا گرەك- ريم كۇرەسىنەن قازاق بالۋاندارى اراسىنان ءالىمحان سىزدىقوۆ ەل نامىسىن قورعادى.
130 كەلى سالماقتا شىققان وتانداسىمىز العاشقى كەزدەسۋىندە 2022 -جىلعى الەم چەمپيوناتىنىڭ قولا جۇلدەگەرى رۋمىن بالۋانى الين الەكسۋك- چۋراريۋمەن كۇرەستى.
اسا تارتىستى وتكەن بەلدەسۋ ناتيجەسىندە سىزدىقوۆ قارسىلاسىن 3:1 ەسەبىمەن ۇتىپ، شيرەك فينالعا شىقتى.
ەستەرىڭىزگە سالا كەتەيىك، فرانسيا استاناسى پاريج قالاسىندا ءوتىپ جاتقان XXXIII جازعى وليمپيادا ويىندارى 11-تامىزدا مارەسىنە جەتەدى. ويىندارعا الەمنىڭ 205 ەلىنەن 10500 سپورتشى قاتىسىپ جاتىر. وليمپياداشىلار 32 سپورت تۇرىنەن 329 مەدال جيىنتىعىن ساراپقا سالىپ جاتىر.
پاريج وليمپياداسىندا بۇگىن، ياعني 5-تامىز كۇنى قازاقستاندىق سپورتشىلار ستەند اتۋ، جەڭىل اتلەتيكا، گرەك-ريم كۇرەسى سەكىلدى 3 جارىس تۇرىنەن باق سىناۋدا.
اۆتور
كۇنسۇلتان وتارباي
