عالىمدار تىلدەردى ءتۇسىنۋدىڭ 3 ءتۇرلى مەحانيزمى بار ەكەنىن انىقتادى

استانا. قازاقپارات - امداردىڭ ءتىلدى ءتۇسىنۋ قابىلەتى ءبىرىڭعاي ەمەس، ءۇش ءتۇرلى كوگنيتيۆتى مەحانيزمگە نەگىزدەلەدى. بۇل تۋرالى npj Science of Learning جۋرنالىندا جاريالانعان زەرتتەۋ ناتيجەلەرى كورسەتتى. 

عالىمدار ءتىلدى مەڭگەرۋگە قينالاتىن 18 مىڭعا جۋىق بالانى زەرتتەپ، ولاردىڭ ءتىل ءتۇسىنۋ داعدىلارى ءۇش بولەك كاتەگورياعا بولىنەتىنىن انىقتادى.

زەرتتەۋدە قاتىسۋشىلاردىڭ تىلدىك قابىلەتتەرى ءۇش نەگىزگى توپقا جىكتەلدى. ءبىرىنشى توپ - قاراپايىم بۇيرىقتاردى ورىنداۋ، ءوز ەسىمىنە جاۋاپ بەرۋ جانە ماقتاۋدى ءتۇسىنۋ. ەكىنشى توپ - تۇستەر، ولشەمدەر مەن ساندار سياقتى سيپاتتامالىق سوزدەردى ءتۇسىنۋ. ءۇشىنشى توپ - كەڭىستىكتىك قاتىناستاردى، ەتىستىكتىڭ شاقتارىن جانە كۇردەلى اڭگىمەلەردى ءتۇسىنۋ داعدىلارىن قامتيدى.

ءبىرىنشى مەحانيزم ادام مەن مايمىلداردا ورتاق بولۋى مۇمكىن، ال ەكىنشىسى شامامەن 2 ميلليون جىل بۇرىن Homo تۇرلەرىندە پايدا بولعان. ءۇشىنشى، ەڭ كۇردەلى مەحانيزم 70 مىڭ جىل بۇرىن دامىعان جانە تولىققاندى ءتىلدى مەڭگەرۋگە مۇمكىندىك بەرگەن.

زەرتتەۋ اۆتورى، بوستون ۋنيۆەرسيتەتىنىڭ نەيروبيولوگى اندرەي ۆىشەدسكيدىڭ ايتۋىنشا، بۇل جاڭالىق تىلدىك بۇزىلىستارى بار بالالارعا ارنالعان تەراپيا ادىستەرىن جەتىلدىرۋگە كومەكتەسەدى. سونداي-اق، زەرتتەۋ ناتيجەلەرى ءتىل ەۆوليۋتسياسى، كوگنيتيۆتى دامۋ جانە نەيرولينگۆيستيكا سالالارى ءۇشىن ماڭىزدى بولماق.