ءاليحان سمايىلوۆ قايىرىمدىلىق قورلار تۋرالى: تەكسەرۋگە قۇزىرەت جوق

استانا. KAZINFORM - ەلىمىزدە مەملەكەت قۇرعان نەمەسە مەملەكەتتىڭ قاتىسۋىمەن نەمەسە مەملەكەتتىڭ بەلگىلى ءبىر فۋنكتسيالارى بەرىلگەن قورلارعا اۋديت جۇرگىزۋ ۇسىنىلدى. بۇل تۋرالى ق ر جوعارى اۋديتورلىق پالاتاسىنىڭ ءتوراعاسى ءاليحان سمايىلوۆ ايتتى.

«جوعارى اۋديتورلىق پالاتانىڭ قايىرىمدىلىق قورلارىن تەكسەرۋگە قۇزىرەتى جوق. جوعارى اۋديتورلىق پالاتا مەملەكەت جۇمساعان بيۋدجەت قاراجاتىن، سونداي- اق مەملەكەتتىك جانە كۆازيمەملەكەتتىك ۇيىمداردا بار اكتيۆتەردى پايدالانۋعا سىرتقى اۋديت جۇرگىزەدى. سونىمەن قاتار، ءماجىلىس قاراستىرىپ جاتقان جاڭا بيۋدجەت كودەكسى شەڭبەرىندە جوعارى اۋديتورلىق پالاتاعا مەملەكەت قاتىسۋىمەن قۇرىلعان بيۋدجەتتىك ەمەس قورلارعا اۋديت جۇرگىزۋ قۇزىرەتى تۋرالى نورما ەنگىزۋدى ۇسىندىق. ياعني، مەملەكەت قۇرعان نەمەسە مەملەكەتتىڭ قاتىسۋىمەن نەمەسە مەملەكەتتىڭ بەلگىلى ءبىر فۋنكتسيالارى بەرىلگەن قورلار. سول كەزدە بىزدە وسىنداي بيۋدجەتتىك ەمەس قورلاردى تەكسەرۋ مۇمكىندىگى بولادى»، - دەدى ءا. سمايىلوۆ سەنات كۋلۋارىندا.

«قازاقستان حالقىنا» قورى بيۋدجەتتىك اقشاعا قۇرىلعان جوق. ازىرگە بىزدە مۇنداي بيۋدجەتتىك ەمەس قورلاردى تەكسەرۋگە قۇزىرەت جوق.

«تەكسەرۋ قۇزىرەتى بولماسا دا، ولاردىڭ اقشاسىن ءادىل جۇمساۋىنا ىقپال ەتە الاسىز با؟»، - دەپ سۇراق قويدى تىلشىلەر.

«مەنىڭ ويىمشا، ولار قوعامدىق ۇيىم رەتىندە تاۋەلسىز اۋديتورلىق كومپانيالاردى تارتۋى كەرەك، قايىرىمدىلىق جاسايتىن ادامدار بۇل اقشانىڭ قالاي پايدالانىلعانى تۋرالى اقپارات بەرۋى كەرەك. سوندىقتان مۇنى قايىرىمدىلىق قورلارىن ۇيىمداستىرۋشىلاردىڭ جاۋاپكەرشىلىگى دەپ سانايمىن» ، - دەدى ءا. سمايىلوۆ.

بۇعان دەيىن قايىرىمدىلىق قورلارىنىڭ قۇرىلۋى مەن قىزمەتى قالاي رەتتەلەتىنىن حابارلاعان ەدىك.