ءاليحان سمايىلوۆ پەن اقىلبەك جاپاروۆ قازاقستان مەن قىرعىزستاننىڭ سۋ سالاسىنداعى ىنتىماقتاستىعىن تالقىلادى

استانا. KAZINFORM - قازاقستان پرەمەر-ءمينيسترى ءاليحان سمايىلوۆ قىرعىزستان مينيسترلەر كابينەتىنىڭ ءتوراعاسى - پرەزيدەنت اكىمشىلىگىنىڭ باسشىسى اقىلبەك جاپاروۆپەن كەلىسسوز جۇرگىزدى.

كەزدەسۋ الماتىدا ەۋرازيالىق ۇكىمەتارالىق كەڭەستىڭ وتىرىسى قارساڭىندا ءوتتى، دەپ حابارلايدى ۇكىمەتتىڭ باسپا ءسوز قىزمەتى.

ءاليحان سمايىلوۆتىڭ ايتۋىنشا، قىرعىزستان - ەلىمىزدىڭ ستراتەگيالىق ارىپتەسى جانە باۋىرلاس مەملەكەت.

«مەملەكەت باسشىلارىمىزدىڭ ساياسي ەرىك-جىگەرىنىڭ ارقاسىندا بۇگىندە قازاق-قىرعىز قاتىناستارى ءوزارا ءىس-قيمىلدىڭ ساپالى جاڭا دەڭگەيىنە شىقتى»، - دەدى پرەمەر-مينيستر.

سونىمەن قاتار ۇكىمەت باسشىسى ەلدەرىمىز اراسىنداعى ساۋدا-ەكونوميكالىق ءوزارا ءىس-قيمىلدىڭ قارقىندى دامىپ كەلە جاتقانىن اتاپ ءوتتى.

بىلتىر تەك 11 ايدا ءوزارا ساۋدا %12 عا ءوسىپ، $1,3 ميللياردقا جەتتى. وعان قوسا قازاقستان مەن قىرعىزستان اراداعى تاۋار اينالىمىنىڭ كولەمىن $2 ميللياردقا جەتكىزۋ جۇمىسىن جالعاستىرۋدا.

«بۇعان ۇكىمەتارالىق كەڭەس جانە ءوڭىرارالىق ىنتىماقتاستىق فورۋمى سياقتى ەكىجاقتى ىنتىماقتاستىق تەتىكتەرىنىڭ ءتيىمدى جۇمىسى ىقپال ەتۋدە. قازاقستان ۇكىمەتى ءارى قاراي دا بارلىق باعىت بويىنشا قازاق-قىرعىز ستراتەگيالىق ارىپتەستىگىن قولداۋعا دايىن»، - دەدى ءاليحان سمايىلوۆ.

ءوز كەزەگىندە اقىلبەك جاپاروۆ قىرعىزستان مەن قازاقستاننىڭ قازىرگى قارىم- قاتىناسى اراداعى ساياسي ديالوگتىڭ جوعارى دەڭگەيىنىڭ دالەلى ەكەنىن اتاپ ءوتتى.

«جىل سايىن ءوزارا ساۋدا-ساتتىق پەن ينۆەستيتسيالار كولەمى ارتىپ، ىسكەرلىك، عىلىمي جانە مادەني بايلانىستار جاندانۋدا. ۇكىمەتارالىق كەڭەس اياسىندا قىرعىز-قازاق ىنتىماقتاستىعىنىڭ ورتاق ستراتەگيالىق ماقساتتارى، تۇجىرىمدامالىق تاسىلدەرى مەن ۇزاق مەرزىمدى دامۋ باعىتتارى تالقىلانىپ جاتىر. ەكى ەل اراسىنداعى بەلسەندى ءوزارا ءىس-قيمىل ءتۇرلى الاڭداردا جۇزەگە اسىرىلۋدا»، - دەدى ول.

اقىلبەك جاپاروۆ قىرعىز تاراپىنىڭ ءوزارا سەنىم مەن تۇسىنىستىككە نەگىزدەلگەن قازاقستانمەن اراداعى وداقتاستىق قاتىناستاردى ودان ءارى تەرەڭدەتۋگە مۇددەلى ەكەنىن اتاپ ءوتتى.

كەزدەسۋ بارىسىندا ۇكىمەت باسشىلارى ەكىجاقتى ىنتىماقتاستىقتىڭ، ونىڭ ىشىندە ساۋدا-ەكونوميكالىق جانە مۇناي-گاز سالالارىنداعى ماسەلەلەردىڭ كەڭ اۋقىمىن قاراستىردى.

سونىمەن قاتار تاراپتار قىسقا مەرزىمدە قازاق-قىرعىز شەكاراسىندا جۇك كولىگى ءۇشىن قوسىمشا وتكىزۋ بەكەتىن اشۋ ماسەلەسىن پىسىقتاۋعا، سونداي-اق سۋ-ەنەرگەتيكا سالاسىنداعى ءوزارا ءىس-قيمىلدى كۇشەيتۋگە كەلىستى.