ءاليحان سمايىلوۆ: ەگەمەندىكتى كوزدىڭ قاراشىعىنداي ساقتاۋ - اسىل بورىشىمىز

 ءاليحان سمايىلوۆ قازاقستاندىقتاردى رەسپۋبليكا كۇنىمەن قۇتتىقتادى، دەپ حابارلايدى Kazinform ق ر ۇكىمەتىنىڭ باسپا ءسوز قىزمەتىنە سىلتەمە جاساپ.

«قۇرمەتتى وتانداستار! بارشاڭىزدى ەلىمىزدىڭ ەڭ ۇلىق مەرەكەسى - رەسپۋبليكا كۇنىمەن شىن جۇرەكتەن قۇتتىقتايمىن!
از عانا ۋاقىتتا اۋقىمدى رەفورمالاردى جۇزەگە اسىرعان قازاقستان جاڭعىرۋ مەن ورنىقتى دامۋدىڭ جاڭا كەزەڭىنە قادام باستى. ەڭبەكقور حالقىمىزدىڭ ىنتىماعىنىڭ ارقاسىندا ەل ەكونوميكاسى جاھاندىق سىن- قاتەرلەرگە توتەپ بەرىپ، جاڭا ونەركاسىپ ساياساتى ءتيىمدى ىسكە اسىرىلىپ كەلەدى.
قوعامدىق ومىرىمىزدە سالتانات قۇرعان ۇلتتىق كەلىسىم مەن الەۋمەتتىك اۋىزبىرشىلىك سياقتى قاستەرلى قۇندىلىقتار عانا مەملەكەتتىگىمىزدىڭ تۇعىرىن بيىكتەتىپ، ەكونوميكالىق جەتىستىكتەرىمىزدىڭ ارقاۋى بولىپ قالا بەرمەك. حالقىمىزدى وتانشىلدىق رۋحىنداعى ورتاق ماقساتقا ۇيىستىرۋدا وسىناۋ مەرەيلى كۇننىڭ ماڭىزى ەرەكشە" دەلىنگەن قۇتتىقتاۋ ماتىنىندە.
ءسوز سوڭىندا پرەمەر- مينيستر ەل يگىلىگى جولىندا ەڭبەك ەتىپ، ەگەمەندىكتى كوزدىڭ قاراشىعىنداي ساقتاۋ - ءبىزدىڭ ءبارىمىزدىڭ اسىل بورىشىمىز ەكەنىن اتاپ ءوتتى.
"ايتۋلى مەرەكەدە سىزدەرگە مىقتى دەنساۋلىق، وتباسىلارىڭىزعا باق- بەرەكە، ەڭبەكتەرىڭىزگە تولاعاي تابىس تىلەيمىن. ەل ەڭسەسى ءاردايىم بيىك بولسىن!"، - دەپ تۇيىندەدى ءسوزىن ۇكىمەت باسشىسى.