ءاليحان سمايىلوۆ ەلىمىزدە ESG ستاندارتتارىن ەنگىزۋدى سىنعا الدى

استانا. KAZINFORM - ۇكىمەت باسشىسى ءاليحان سمايىلوۆ قورشاعان ورتاعا جاۋاپكەرشىلىكپەن قاراۋدى كوزدەيتىن ESG ستاندارتتارىنىڭ ەنگىزىلۋ بارىسىنىڭ باياۋ ءجۇرىپ جاتقانىن ايتتى.

«قورشاعان ورتانى قورعاۋ بويىنشا وزىق حالىقارالىق تاجىريبە نەگىزىندە ESG ستاندارتتارىن ەنگىزۋ قارقىنى تومەن. الەمنىڭ كوپتەگەن كومپانيالارى ءۇشىن بۇل ستاندارتتار جۇمىستىڭ اجىراماس بولىگىنە اينالعان. ولار ەكولوگيالىق كورسەتكىشتەردى عانا ەمەس، الەۋمەتتىك، قارجىلىق جانە وندىرىستىك كورسەتكىشتەردى دە جاقسارتۋعا ىقپال ەتەدى. سونداي-اق ESG ستاندارتتارى - حالىقارالىق قارجى ينستيتۋتتارىنىڭ كرەديت بەرۋى كەزىندە نازارعا الاتىن كريتەريلەردىڭ ءبىرى»، - دەدى ءاليحان سمايىلوۆ ۇكىمەت وتىرىسىندا.

ونىڭ ايتۋىنشا، تابيعي رەسۋرستاردى ۇنەمدەيتىن جانە قالدىقسىز تەحنولوگيالاردى بەلسەندىرەك ەنگىزۋ قاجەت.

«تابيعاتتى قورعاۋ شارالارىن جاپپاي جۇرگىزۋدىڭ ماڭىزى زور. كومپانيالار اعاش وتىرعىزۋ، وزەن ارنالارىن تازارتۋ، ورمان القاپتارى مەن دالالاردا قوقىس جيناۋ ناۋقاندارىن جۇيەلى تۇردە جۇرگىزۋى ءتيىس. ەكولوگيا جانە تابيعي رەسۋرستار مينيسترلىگى مەن اكىمدىكتەر تابيعات پايدالانۋشىلارمەن بىرلەسىپ جوسپارلى جۇمىس جۇرگىزۋ كەرەك. سونىمەن قاتار ەكولوگيالىق ءىس-شارالاردى پراكتيكالىق تۇرعىدان ىسكە اسىرۋعا بەلگىلى ءبىر ۋاقىت كەرەك. ارينە، ناتيجە بىردەن بولمايدى»، - دەدى ۇكىمەت باسشىسى.

ايتا كەتەيىك ESG (environmental ،social ،governance) - ستاندارتتارى قورشاعان ورتاعا جاۋاپكەرشىلىكپەن قاراۋدى، جوعارى الەۋمەتتىك جاۋاپكەرشىلىكتى جانە كورپوراتيۆتىك باسقارۋعا قويىلاتىن ساپالى تالاپتاردى قامتيدى.