ءاليحان سمايىلوۆ كوممۋنالدىق گيدروتەحنيكالىق قۇرىلىستاردى جان-جاقتى تەكسەرۋدى تاپسىردى
استانا. KAZINORM - بۇگىن ۇكىمەت وتىرىسىندا پرەمەر-مينيستر ءاليحان سمايىلوۆ ونەركاسىپ مينيسترلىگىنە وتاندىق سۋ ۇنەمدەۋ جابدىقتارى ءوندىرىسىن ۇيىمداستىرۋعا قاتىستى ۇسىنىس ەنگىزۋدى تاپسىردى.
«ءوڭىر اكىمدىكتەرى 1 ايلىق مەرزىمدە كوممۋنالدىق سۋارۋ مەن جەكە سۋارۋ جۇيەلەرىن قالپىنا كەلتىرۋ جانە ولاردى سيفرلاندىرۋ بويىنشا جول كارتالارىن قابىلداۋلارى قاجەت. سونداي-اق كوممۋنالدىق گيدروتەحنيكالىق قۇرىلىستاردى جان-جاقتى تەكسەرۋ كەرەك»، - دەدى ۇكىمەت باسشىسى.
ونىڭ اتاپ وتۋىنشە، تۇجىرىمدامانى ءتيىمدى ىسكە اسىرۋ ءۇشىن سۋ سالاسىن دامىتۋدىڭ كەشەندى جوسپارىن قابىلداۋ قاراستىرىلعان.
«بۇل جوسپار تۇجىرىمدامانى مودەرنيزاتسيالاۋ مەن سالۋدى قاراستىراتىن سۋ ينفراقۇرىلىمى وبەكتىلەرىنىڭ ناقتى تىزبەسىمەن تولىقتىرادى. سوندىقتان سۋ رەسۋرستارى مينيسترلىگى 2 اپتالىق مەرزىمدە كەشەندى جوسپاردىڭ جوباسىن ۇكىمەت اپپاراتىنا ەنگىزۋدى قامتاماسىز ەتسىن. ونەركاسىپ مينيسترلىگى سۋ رەسۋرستارى جانە اۋىل شارۋاشىلىعى مينيسترلىكتەرىمەن بىرگە 1 اي مەرزىمدە وتاندىق سۋ ۇنەمدەۋ جابدىقتارىنىڭ ءوندىرىسىن ۇيىمداستىرۋ جونىندە ناقتى ۇسىنىستار ەنگىزسىن»، - دەدى ءاليحان سمايىلوۆ.
اۆتور
مارلان جيەمباي
