ءاليحان سمايىلوۆ شاحتاداعى اپاتتارعا ءبىرىنشى كەزەكتە كىم كىنالى ەكەنىن ايتتى

 استانا. Kazinform - ۇكىمەت وتىرىسىندا پرەمەر-مينيستر ءاليحان سمايىلوۆ قازاقستان شاحتالارىندا ەڭبەك قاۋىپسىزدىگى ساقتالمايتىنىن سىنادى. 

«مەملەكەت باسشىسى كوستەنكو شاحتاسىندا كەنشىلەردىڭ قازا بولۋىنا بايلانىستى تەرگەۋ جۇمىسىن جۇرگىزىپ، «ارسەلورميتتال تەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋدى تاپسىردى. وسىنداي اپات بيىل تامىز ايىندا دا بولعان. ول كەزدە 5 شاحتەر قازا تاپتى. كوپ ادامنىڭ ولىمىنە اكەپ سوققان اپات وندىرىستەگى قاۋىپسىزدىك تالاپتارىنىڭ ساقتالماۋىنا تىكەلەي بايلانىستى. بۇل - ءبىرىنشى كەزەكتە كاسىپورىن باسشىلىعىنىڭ كىناسى»، - دەدى ۇكىمەت باسشىسى.

ايتا كەتەيىك، 28-قازاندا قاراعاندى وبلىسىنداعى كوستەنكو اتىنداعى شاحتادا اپات بولىپ، كەيىن 45 ادامنىڭ قازا تاپقانى حابارلانعان بولاتىن.

وسىعان بايلانىستى قازاقستاندا 29-قازان - جالپىۇلتتىق ازا تۇتۋ كۇنى بولىپ جاريالاندى.